ಮೂಡು ಗೋಪಾಡಿಯಲ್ಲಿ ಹನಿ ಟ್ರ್ಯಾಪ್: ಆರು ಮಂದಿ ಬಂಧನ

ಕುಂದಾಪುರ: ತಾಲೂಕಿನ ವಕ್ವಾಡಿ ಸಮೀಪ ಮೂಡು ಗೋಪಾಡಿಯಲ್ಲಿ ಹನಿಟ್ರ್ಯಾಪ್ ಜಾಲ ಬೆಳಕಿಗೆ ಬಂದಿದ್ದು, ಮಹಿಳೆ ಸಹಿತ ಆರು ಮಂದಿಯನ್ನು ಕುಂದಾಪುರ ಪೊಲೀಸರು ಬಂಧಿಸಿದ್ದಾರೆ.

ಮೂಲತಃ ಕಾಸರಗೋಡಿನವನಾದ ಸಂತ್ರಸ್ಥ ಸುಧೀರ್ ಎಂಬಾತ ಈ ಹಿಂದೆ ಹಲವು ಬಾರಿ ಇಸ್ಪೀಟ್ ಆಡಲೆಂದು ಕುಂದಾಪುರಕ್ಕೆ ಬರುತ್ತಿದ್ದ. ಹೀಗೆ ಬಂದಾಗ ಮೂಡುಗೋಪಾಡಿಯ ಮಹಿಳೆ ಸಂಪರ್ಕವಾಗಿದ್ದಾಳೆ. ಬಳಿಕ ಆರೋಪಿ ಮಹಿಳೆ ಮಂಗಳವಾರ ರಾತ್ರಿ ತನ್ನ ಮನೆಯಾದ ಮೂಡುಗೋಪಾಡಿಗೆ ಸುಧೀರನನ್ನು ಬರಹೇಳಿದ್ದಾಳೆ. ಆರೋಪಿ ಹೇಳಿದ ಮನೆಗೆ ಸುಧೀ‌ರ್ ಹೋಗಿದ್ದಾನೆ. ಮನೆಗೆ ಹೋದ ಬಳಿಕ ಮಹಿಳೆ ಬಾಗಿಲು ಹಾಕಿಕೊಂಡಿದ್ದು ತನ್ನ ಸಹಚರರಿಗೆ ಬರಲು ಹೇಳಿದ್ದಾಳೆ. ಅದರಂತೆ ಇತರ ಐವರು ಆರೋಪಿಗಳು ಆಕೆಯ ಮನೆಯೊಳಗೆ ಬಂದಿದ್ದು, ವಿಡಿಯೋ ಮಾಡಿ ಬ್ಲ್ಯಾಕ್ ಮೇಲ್ ಮಾಡಿದ್ದಾರೆ. ಬಳಿಕ ಸಂತ್ರಸ್ಥ ಸುಧೀರ್ ಬಳಿಯಿದ್ದದ್ದೆಲ್ಲವನ್ನೂ ದೋಚಿ ಇನ್ನೂ ಹೆಚ್ಚಿನ ಹಣಕ್ಕಾಗಿ ಬೇಡಿಕೆಯಿಟ್ಟು ಪೊಲೀಸರಿಗೆ ಹೇಳಿದರೆ ಕೊಲೆ ಮಾಡುವುದಾಗಿ ಬೆದರಿಸಿದ್ದಾರೆ.

ಹನಿಟ್ರ್ಯಾಪ್ ಗೆ ಒಳಗಾದ ಸುಧೀರ್ ಕುಂದಾಪುರ ಠಾಣೆಯಲ್ಲಿ ದೂರು ದಾಖಲಿಸಿದ್ದಾನೆ. ಪ್ರಕರಣದ ಬೆನ್ನತ್ತಿದ ಪೊಲೀಸರು ಆರೋಪಿ ಕಿಂಗ್ ಪಿನ್ ಮಹಿಳೆ ಸಹಿತ ಆರು ಜನರನ್ನು ಬಂಧಿಸಿದ್ದಾರೆ. ಈ ಜಾಲದಲ್ಲಿ ಇನ್ನಷ್ಟು ಮಂದಿ ಇರುವ ಶಂಕೆ ಮೂಡಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.