ದಕ್ಷಿಣ ಕನ್ನಡ-ಉಡುಪಿಯಲ್ಲಿ ಕೊರತೆಯಾಗಿದೆ ‘ರಕ್ತ’

ಮಂಗಳೂರು: ಬಿಸಿಲಿನ ತಾಪ ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲೆಗಳಲ್ಲಿ ರಕ್ತದ ಲಭ್ಯತೆ ಕಡಿಮೆಯಾಗಿದೆ. ಪರಿಣಾಮ ಉಭಯ ಜಿಲ್ಲಾಸ್ಪತ್ರೆಗಳ ಸಹಿತ ವಿವಿಧ ಆಸ್ಪತ್ರೆಗಳಲ್ಲಿ ಬೇಡಿಕೆ ಅನುಗುಣವಾಗಿ ರಕ್ತ ದೊರೆಯುತ್ತಿಲ್ಲ. ಬಹುತೇಕ ರಕ್ತ ನಿಧಿಗಳಲ್ಲಿ ಈ ಸಮಸ್ಯೆ ಎದುರಿಸುತ್ತಿವೆ. ಮಂಗಳೂರಿನ ವೆನ್ಲಾಕ್ ಆಸ್ಪತ್ರೆಯ ಬ್ಲಡ್ ಬ್ಯಾಂಕ್‌ನಲ್ಲಿ ನಿತ್ಯ 80-100 ಯುನಿಟ್ ರಕ್ತದ ಅವಶ್ಯಕತೆಯಿದೆ. ಆದರೆ ಪ್ರಸ್ತುತ ಕೇವಲ 80 ಯುನಿಟ್ ರಕ್ತ ಮಾತ್ರವೆ ಇದೆ. ಉಡುಪಿ ಜಿಲ್ಲಾಸ್ಪತ್ರೆಯಲ್ಲಿ ದಿನಕ್ಕೆ 40-60 ಯುನಿಟ್ ರಕ್ತದ ಅವಶ್ಯಕತೆಯಿದೆ. ಅಲ್ಲಿಯೂ ರಕ್ತದ ಸಂಗ್ರಹ ಕಡಿಮೆ ಇದೆ.

ಈ ಪ್ರದೇಶದಲ್ಲಿ ಹಲವಾರು ವೈದ್ಯಕೀಯ ಕಾಲೇಜುಗಳು ಮತ್ತು ಹಲವಾರು ರಕ್ತನಿಧಿಗಳು ಇದ್ದರೂ, ಬೇಡಿಕೆ ಪೂರೈಕೆಗಿಂತ ಹೆಚ್ಚೇ ಇದೆ. ಈ ಜಿಲ್ಲೆಗಳಲ್ಲಿ ದೈನಂದಿನ ಶಸ್ತ್ರಚಿಕಿತ್ಸೆ, ಹೆರಿಗೆಗಳು ಮತ್ತು ಇತರ ರೋಗಿಗಳ ಚಿಕಿತ್ಸೆಗೆ ಹಲವಾರು ಯುನಿಟ್ ರಕ್ತಕ್ಕೆ ಬೇಡಿಕೆ ಇದೆ. ಆದರೆ ಪ್ರಸ್ತುತ ದಾನಿಗಳ ಸಂಖ್ಯೆ ತೀವ್ರವಾಗಿ ಕುಸಿದಿದ್ದು, ಕೊರತೆಯನ್ನು ನೀಗಿಸಲು ಬ್ಲಡ್ ಬ್ಯಾಂಕ್‌ಗಳು ದಾನಿಗಳನ್ನು ಹುಡುಕುವಂತಾಗಿದೆ. ಉಡುಪಿ ಜಿಲ್ಲಾ ಆಸ್ಪತ್ರೆಯನ್ನು ಹೊರತುಪಡಿಸಿ, ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯ ರಕ್ತನಿಧಿಯಲ್ಲಿಯೂ ಸಹ ನಿಯಮಿತ ರಕ್ತದಾನ ಶಿಬಿರಗಳ ಕೊರತೆಯಿಂದಾಗಿ ರಕ್ತ ಸಂಗ್ರಹ ಕಡಿಮೆಯಾಗುತ್ತಿದೆ. ಈ ಕೊರತೆಯಿಂದಾಗಿ ಆಸ್ಪತ್ರೆಗಳು ರೋಗಿಗಳ ಕುಟುಂಬಗಳು ಸ್ವತಃ ರಕ್ತದಾನ ಮಾಡುವಂತೆ ವಿನಂತಿಸುತ್ತಿವೆ.

ಉಡುಪಿ ಜಿಲ್ಲಾಸ್ಪತ್ರೆ ಹೊರತು ಪಡಿಸಿ, ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯ ರಕ್ತನಿಧಿಯಲ್ಲಿಯೂ ಕೂಡ ನಿಯಮಿತ ರಕ್ತದಾನ ಶಿಬಿರಗಳ ಕೊರತೆಯಿಂದಾಗಿ ರಕ್ತ ಸಂಗ್ರಹ ಕಡಿಮೆಯಾಗುತ್ತಿದೆ. ಈ ಕೊರತೆಯಿಂದಾಗಿ ಆಸ್ಪತ್ರೆಗಳು ರೋಗಿಗಳ ಮನೆಮಂದಿಗೆ ರಕ್ತನೀಡುವಂತೆ ವಿನಂತಿಸುವಂತಾಗಿದೆ.

ರಕ್ತದಾನದ ಬಗ್ಗೆ ನಿಯಮಿತವಾಗಿ ಜಾಗೃತಿ ಅಭಿಯಾನಗಳು ನಡೆಯುತ್ತಿದ್ದರೂ, ಬಿಸಿಲಿನ ತಾಪದಿಂದ ಬೇಡಿಕೆ ಹೆಚ್ಚಾಗಿದ್ದು, ದಾನಿಗಳ ಕೊರತೆ ಎದುರಾಗಿದೆ. ವೈದ್ಯರು ಆರೋಗ್ಯವಂತ ವ್ಯಕ್ತಿಗಳು, ವಿಶೇಷವಾಗಿ ರೋಗಿಗಳ ಕುಟುಂಬಗಳು ರಕ್ತದಾನ ಮಾಡಲು ಮುಂದಾಗಬೇಕು. ಕುಟುಂಬಸ್ಥರು ರಕ್ತ ನೀಡಿದ್ದಲ್ಲಿ ರಕ್ತದ ಕೊರತೆಯನ್ನು ದೂರಮಾಡಬಹುದಾಗಿದೆ. ವಿಶೇಷವಾಗಿ ಯುವ ಜನತೆ ರಕ್ತದಾನವನ್ನು ಗಂಭೀರವಾಗಿ ಪರಿಗಣಿಸಬೇಕು. ರಕ್ತದಾನದಿಂದ ತಾವು ಆರೋಗ್ಯವಂತರಾಗುವುದರ ಜತೆಗೆ ಇತರರಿಗೂ ಮರುಜೀವ ನೀಡಲು ಸಾಧ್ಯವಿದೆ.

ಎಲ್ಲಾ ಆಸ್ಪತ್ರೆಗಳು ಪ್ರತಿದಿನ ಶಸ್ತ್ರಚಿಕಿತ್ಸೆಗಳನ್ನು ನಡೆಸುತ್ತವೆ. ಈ ಸಂದರ್ಭದಲ್ಲಿ ರಕ್ತದ ಅಗತ್ಯವಿರುತ್ತದೆ. ಹೆರಿಗೆ ಸಂದರ್ಭದಲ್ಲಿ ರಕ್ತಸ್ರಾವವಾದರೆ, ಅಪಘಾತಗಳು ಮತ್ತು ರಕ್ತಹೀನತೆಯಿಂದ ಬಳಲುತ್ತಿರುವ ರೋಗಿಗಳಿಗೆ ಸಕಾಲಿಕ ರಕ್ತ ಪೂರೈಕೆಯ ಅಗತ್ಯವಿರುತ್ತದೆ. ಆದ್ದರಿಂದ, ನಿರಂತರ ರಕ್ತ ಪೂರೈಕೆ ಅತ್ಯಗತ್ಯವಿದ್ದು, ರಕ್ತದ ಲಭ್ಯತೆ ಹೆಚ್ಚಿಸುವುದು ಆದ್ಯತೆಯಾಗಿದೆ.

ಕರಾವಳಿ ಪ್ರದೇಶದ ಈಗ ಉರಿಬಿಸಿಲು, ತೀವ್ರ ಸೆಕೆಯಿಂದ ತತ್ತರಿಸಿಹೋಗಿದ್ದಾರೆ. ಹೀಗಾಗಿ ಜನರು ಮನೆಯಿಂದ ಹೊರಬರಲು ಹಿಂದೇಟು ಹಾಕುತ್ತಿದ್ದಾರೆ. ರಕ್ತದಾನ ಶಿಬಿರಗಳನ್ನು ಆಯೋಜಿಸುವ ಸ್ಥಳಗಳಲ್ಲೂ ವಿಪರೀತ ಸೆಕೆ ಇರುವ ಕಾರಣದಿಂದಾಗಿ ಜನ ರಕ್ತ ನೀಡಲು ಮುಂದೆ ಬರುತ್ತಿಲ್ಲ. ಹಿಂದೆ ನೂರಾರು ದಾನಿಗಳು ಭಾಗವಹಿಸುತ್ತಿದ್ದ ಶಿಬಿರಗಳಲ್ಲಿ ಪ್ರಸ್ತುತ 30-50 ಮಂದಿ ಮಾತ್ರ ಭಾಗವಹಿಸುತ್ತಿದ್ದಾರೆ.

ನಿರ್ಜಲೀಕರಣದ ಬಗೆಗಿನ ಆತಂಕವೂ ಸಂಭಾವ್ಯ ದಾನಿಗಳನ್ನು ತಡೆಯುತ್ತಿವೆ. ಕಾಲೇಜು ವಿದ್ಯಾರ್ಥಿಗಳು ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿದ್ದಾರೆ ಅಥವಾ ಬೇಸಿಗೆ ರಜೆಯಲ್ಲಿ ಹೊರಡುತ್ತಿದ್ದಾರೆ. ಈ ಎಲ್ಲ ಕಾರಣಗಳಿಂದ ರಕ್ತದಾನ ಶಿಬಿರಗಳು ನಡೆಯದೆ ನಿರೀಕ್ಷಿತ ಪ್ರಮಾಣದಲ್ಲಿ ರಕ್ತ ಸಂಗ್ರಹಿಸಲು ಸಾಧ್ಯವಾಗುತ್ತಿಲ್ಲ.

ರಕ್ತದ ಕೊರತೆ ನೀಗಿಸಲು ರಕ್ತದಾನವೊಂದೇ ಮಾರ್ಗ. ರಾಷ್ಟ್ರೀಯತೆಯ ಮನೋಭಾವ ಬೆಳೆಸಿಕೊಂಡು ರಕ್ತ ನೀಡಲು ಯುವ ಜನತೆ ಮುಂದಾಗಬೇಕು. ದ.ಕ. ಜಿಲ್ಲೆಯಲ್ಲಿ 13ಕ್ಕೂ ಅಧಿಕ ರಕ್ತ ನಿಧಿಗಳಿದ್ದು, ಜನ ತಮಗೆ ಹತ್ತಿರವಿರುವ ರಕ್ತನಿಧಿಗಳಲ್ಲಿ ರಕ್ತ ನೀಡಲು ಅವಕಾಶವಿದೆ. ರಕ್ತದಾನ ಮಾಡುವುದರಿಂದ ಮತ್ತೊಬ್ಬರಿಗೆ ಜೀವದಾನ ಮಾಡಲು ಸಾಧ್ಯ. ವೆನ್ಲಾಕ್ ಆಸ್ಪತ್ರೆಯಲ್ಲಿ ಮೊದಲ ಬಾರಿಗೆ ಕೊರತೆಯಾಗಿದ್ದು, ದಾನಿಗಳು ಪರಿಹಾರ ಒದಗಿಸಬಹುದು ಎಂದು ವೆನ್‌ಲಾಕ್ ಆಸ್ಪತ್ರೆಯ ರಕ್ತನಿಧಿ ವಿಭಾಗದ ಮುಖ್ಯಸ್ಥ ಡಾ. ಶರತ್ ಕುಮಾರ್ ತಿಳಿಸಿದ್ದಾರೆ.