Mangalore: ಸದ್ಯ ನೀರು ರೇಶನಿಂಗ್ ಇಲ್ಲ

ಮಂಗಳೂರು: ತುಂಬೆ ಡ್ಯಾಂಗೆ ಹರೇಕಳ ಡ್ಯಾಂನ ನೀರು ಪಂಪಿಂಗ್‌ನ ಹೊರತಾಗಿಯೂ ಎಎಂಆರ್ ಡ್ಯಾಂನ ನೀರು ಹರಿಸಿ ತುಂಬೆ ನೀರಿನ ಮಟ್ಟ ಏರಿಸಲಾಗಿತ್ತು. ಆದರೆ ಗುರುವಾರ ಮತ್ತೆ 0.15 ಮೀ. ಕುಸಿದಿದೆ. ಪ್ರಸಕ್ತ ತುಂಬೆಯಲ್ಲಿ 5.59 ಮಿ. ನೀರಿದ್ದು, ಇದು ಮಂದಿನ 50 ದಿನಗಳವರೆಗೆ ಮಾತ್ರ ಲಿಪ್ಟ್ ಮಾಡಲು ಸಾಧ್ಯ. ಈ ಮಧ್ಯೆ ನೀರು ರೇಷನಿಂಗ್ ಮಾಡುವ ನಿರ್ಧಾರ ಸದ್ಯ ಇಲ್ಲ ಎಂದು ಮಂಗಳೂರು ಮಹಾನಗರ ಪಾಲಿಕೆಯು ಸ್ಪಷ್ಟಪಡಿಸಿದೆ.

ಹರೇಕಳ ಡ್ಯಾಂನಿಂದ ಪ್ರತೀ ದಿನ 50ರಿಂದ 60 ಎಂಎಲ್ಡಿ ನೀರು ತುಂಬೆ ಡ್ಯಾಂಗೆ ಪಂಪ್ ಮಾಡಲಾಗುತ್ತಿದೆ. ಮಂಗಳೂರಿಗೆ ನಿತ್ಯ 155 ಎಂಎಲ್‌ಡಿ ನೀರು ಸರಬರಾಜು ಮಾಡುವ ಕಾರಣದಿಂದ ಶೇ.40ರಷ್ಟು ನೀರನ್ನು ಡ್ಯಾಂನ ಕೆಳಭಾಗದಿಂದ ಪಡೆಯಲಾಗುತ್ತಿದೆ. ಕಳೆದೊಂದು ವಾರದಿಂದ ಪ್ರತೀ ದಿನ 10 ಸೆಂ.ಮೀ. ನೀರು ತುಂಬೆ ಡ್ಯಾಂನಲ್ಲಿ ಕಡಿಮೆಯಾಗುತ್ತದೆ. ಆದರೆ ಈಗ ಡ್ಯಾಂನ ಕೆಳಭಾಗದ ನೀರು ಪಂಪಿಂಗ್ ಮಾಡುವ ಕಾರಣ ಸದ್ಯ 6-7 ಸೆಂ.ಮೀ.ನಷ್ಟು ನೀರು ಕಡಿಮೆಯಾಗುತ್ತಿದೆ. ಪ್ರಸಕ್ತ ಎಎಂಆರ್ ಡ್ಯಾಂ ಮಟ್ಟ 15.74 ಮೀಟರ್ ಇದೆ. ಇಲ್ಲೂ ಪ್ರತೀ ದಿನ 0.04 ಮೀ. ನೀರು ಕುಸಿಯುತ್ತಿದೆ. ತುಂಬೆ ಡ್ಯಾಂನ ಮಟ್ಟ 5ಕ್ಕೆ ಇಳಿದಾಗ ಎಎಂಆರ್ನಿಂದ ಮತ್ತೆ ನೀರು ಬಿಡಲು ಜಿಲ್ಲಾಡಳಿತ ನಿರ್ಧರಿಸಿದೆ. 

ಇದೀಗ ಡ್ಯಾಂನಲ್ಲಿ ದಾಸ್ತಾನಾಗಿರುವ ನೀರು ಮುಂದಿನ 48-50ದಿನಗಳಿಗೆ ಸಾಕಾಗಬಹುದು. ಹಾಗಾಗಿ ಸದ್ಯ ಮಂಗಳೂಗೆ ನೀರು ರೇಷನಿಂಗ್ ಮಾಡುವುದಿಲ್ಲ. ತುಂಬೆಯಲ್ಲಿ ನೀರು ಕಡಿಮೆಯಾದರೆ ಎಎಂಆರ್ನಿಂದ ಮತ್ತೆ ನೀರು ಬಿಡುವಂತೆ ಜಿಲ್ಲಾಡಳಿತಕ್ಕೆ ಮನವಿ ಮಾಡಲಾಗಿದೆ ಎಂದು ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ತಿಳಿಸಿದ್ದಾರೆ.