ಕುಂಜಾರುಗಿರಿ ರಸ್ತೆ ದುಸ್ಥಿತಿಯ ವಿರುದ್ಧ ಹೊಂಡಗುಂಡಿಯಲ್ಲಿ ಬಾಳೆಗಿಡ ನೆಟ್ಟು ಕೃಷಿ ರಕ್ಷಿಸುವಂತೆ ವಿಶಿಷ್ಟ ಪ್ರತಿಭಟನೆ

ಶಿರ್ವ: ಕುರ್ಕಾಲು ಗ್ರಾಮ ಪಂಚಾಯತ್ ವ್ಯಾಪ್ತಿಯ ಸುಭಾಸ್‌ನಗರ ಕುಂಜಾರುಗಿರಿ ಪಾಜಕ ರಸ್ತೆ ಸುಭಾಸ್‌ನಗರದ ಕುಂಜಾರು ದೇವಳದ ದ್ವಾರದಿಂದ ಮುಂದೆ ರಸ್ತೆ ಹೊಂಡಗುಂಡಿಮಯವಾಗಿ ಸಾಕಷ್ಟು ಹದೆಗೆಟ್ಟಿದ್ದು ವಾಹನ ಚಾಲಕರಿಗೆ ಕಂಟಕವಾಗಿ ಪರಿಣಿಮಿಸಿದೆ. ಜನಪ್ರತಿನಿಗಳಾಗಲಿ, ಅಧಿಕಾರಿಗಳಾಗಲಿ ಇದನ್ನು ಸರಿಪಡಿಸಲುವ ಬದ್ಧತೆ ತೋರದಿರುವ ಹಿನ್ನಲೆಯಲ್ಲಿ ಸ್ಥಳೀಯರು ರಸ್ತೆಯ ಹೊಂಡ ಗುಂಡಿಯಲ್ಲಿ ಬಾಳೆಗಿಡ ನೆಟ್ಟು ಪ್ರತಿಭಟಿಸಿದ್ದಾರೆ. ‘ನಮಗೆ ರಸ್ತೆ ಅಭಿವೃದ್ಧಿ ಬೇಡ. ಕೃಷಿ ಅಭಿವೃದ್ಧಿ ಆದರೆ ಸಾಕು. ದಯವಿಟ್ಟು ನನ್ನ ಜೀವ ಉಳಿಸಿ’ ಎಂದು ಬಾಳೆಗಿಡ ಅಂಗಲಾಚುವಂತೆ ಬಿಂಬಿಸಿ ಗಿಡನೆಟ್ಟು ಬೋರ್ಡ್ ಅಳವಡಿಸಿದ್ದು ಗಮನ ಸೆಳೆದಿದೆ. ಜಾಲತಾಣಗಳಲ್ಲಿ ವೈರಲ್ ಆಗಿದ್ದು ಜನಪ್ರತಿನಿಧಿಗಳು ಮತ್ತು ಸಂಬಂದಪಟ್ಟವರ ಗಮನ ಸೆಳೆಯಲು ಪ್ರಯತ್ನಿದ್ದಾರೆ.

ಕಾಪು ಪುರಸಭೆಯ ಬಹುಕೋಟಿ ಕುಡಿಯುವ ನೀರಿನ ಯೋಜನೆ ಹಾಗೂ ಹರ್‌ಘರ್ ಜಲ್ ಯೋಜನೆಯ ಕಾರಣಕ್ಕೆ ವರ್ಷದ ಹಿಂದೆ ಇಲ್ಲಿ ರಸ್ತೆ ಬದಿಯಲ್ಲಿ ನೀರಿನ ಪೈಪ್‌ಲೈನ್ ಅಳವಡಿಸಲು ರಸ್ತೆಯ ಅಂಚನ್ನು ಅಗೆದು ಪೈಪ್ ಅಳವಡಿಸಿ ಕೇವಲ ಮಣ್ಣು ಮುಚ್ಚಿ ಬಿಟ್ಟುಬಿಟ್ಟಿದ್ದರ ಪರಿಣಾಮ ಈ ಭಾಗದಲ್ಲಿ ಓಡಾಡುವ ವಾಹನಗಳ ಭರಾಟೆಯಿಂದಾಗಿ ರಸ್ತೆ ಸಂಪೂರ್ಣ ಹದೆಗೆಟ್ಟು ಹೋಗಿದೆ.

ದಿನ ಬಿಟ್ಟು ದಿನ ಸುರಿಯುತ್ತಿರುವ ಮಳೆಗೆ ರಸ್ತೆಯುದ್ದಕ್ಕೂ ಹೊಂಡಗುಂಡಿ ನಿರ್ಮಾಣಗೊಂಡು ಆಚಾರ್ಯ ಮಧ್ವರ ಜನ್ಮಭೂಮಿ ಪಾಜಕ ಕ್ಷೇತ್ರ, ಗಿರಿದುರ್ಗೆ ಖ್ಯಾತಿಯ ಕುಂಜಾರುಗಿರಿ ಬೆಟ್ಟದಲ್ಲಿವ ಶ್ರೀದುರ್ಗಾದೇವಿ ದೇವಸ್ಥಾನ, ಪರಶುರಾಮ ಸೃಷ್ಠಿ ಎಂಬ ಖ್ಯಾತಿಯ ಕರಾವಳಿಯಲ್ಲಿ ಪುರಾತನ ಇತಿಹಾಸ ಇರುವ ಈ ಭಾಗದ ಏಕೈಕ ಶ್ರೀಪರಶುರಾಮ ದೇವಸ್ಥಾನ, ಪಾಜಕ ಆನಂದ ತೀರ್ಥ ಸಮೂಹ ವಿದ್ಯಾಸಂಸ್ಥೆಗಳಿಗೆ ಸಂಪರ್ಕ ಕಲ್ಪಿಸುವ ಈ ರಸ್ತೆಯಲ್ಲಿ ದಿನಂಪ್ರತೀ ನೂರಾರು ವಾಹನ ಓಡಾಡುತ್ತವೆ. ಕಟಪಾಡಿ ಮೂಲಕ ಪಡುಬೆಳ್ಳೆ ಮತ್ತು ಮೂಡುಬೆಳ್ಳೆ ಸಂಪರ್ಕಿಸುವ ಈ ಪ್ರಮುಖ ರಸ್ತೆಯ ಅವಗಣನೆ ನಡೆದಿದ್ದು ಇದನ್ನು ಸ್ಥಳೀಯರು ವಿಶಿಷ್ಡವಾಗಿ ಪ್ರತಿಭಟಿಸಿ ಗಮನ ಸೆಳೆಯುವ ಪ್ರಯತ್ನ ಮಾಡಿದ್ದಾರೆ.

ಕಾಪು ತಾಲೂಕು ವ್ಯಾಪ್ತಿಯಲ್ಲಿ ಸಾವಿರಾರು ಹೊಂಡ ಗುಂಡಿಗಳಿಂದ ಕೂಡಿದ ರಸ್ತೆಗೆ ಅಲ್ಲಲ್ಲಿ ತಾತ್ಕಾಲಿಕ ತೇಪೆ ಕಾರ್ಯ ಚಾಲ್ತಿಯಲ್ಲಿದ್ದರೂ, ಬಿಟ್ಟು ಬಿಟ್ಟು ಬರುತ್ತಿರುವ ಮಳೆಯಿಂದ ತೇಪೆಯಿಂದ ಹೊಂಡಮುಕ್ತ ರಸ್ತೆ ಕಾಣುವ ಗ್ಯಾರಂಟಿ ಇಲ್ಲ. ನವೆಂಬರ್ ತಿಂಗಳು ಪೂರ್ತಿ ಬಿಸಿಲು ಇದ್ದಲ್ಲಿ ಡಾಮರು ಪ್ಲ್ಯಾಂಟ್ ಓಪನ್ ಆದಲ್ಲಿ ಪೂರ್ಣ ಪ್ರಮಾಣದಲ್ಲಿ ತಾತ್ಕಾಲಿಕ ನೆಲೆಯಲ್ಲಿ ಹೊಂಡಗಳನ್ನು ಮುಚ್ಚುವ ಯೋಜನೆಯನ್ನು ಇಲಾಖೆ ಹಾಕಿಕೊಂಡಿದೆ. ಸಂಬಂದಪಟ್ಟವರು ಇತ್ತ ಗಮನಹರಿಸುವರೋ ಕಾದು ನೋಡಬೇಕಿದೆ.