ಅಪರಾಧ ನಿಯಂತ್ರಣಕ್ಕೆ ಕೆ-ಕೋಕಾ ಅಸ್ತ್ರ ಬಳಕೆ: ಪೊಲೀಸ್ ಆಯುಕ್ತರು

ಮಂಗಳೂರು: ಕಮಿಷನರೇಟ್ ವ್ಯಾಪ್ತಿಯಲ್ಲಿ ಅಪರಾಧ ಚಟುವಟಿಕೆ ನಿಯಂತ್ರಣಕ್ಕೆ ತರಲು ಆರೋಪಿಗಳ ಮೇಲೆ ಕೆ-ಕೋಕಾ (ಕರ್ನಾಟಕ ಕಂಟ್ರೋಲ್ ಆಫ್ ಆರ್ಗನೈಸ್ಡ್ ಕ್ರೈಮ್ ಆಕ್ಟ್) ಕಾಯ್ದೆಯನ್ನು ಕಟ್ಟುನಿಟ್ಟಾಗಿ ಪ್ರಯೋಗಿಸಲು ಪೊಲೀಸ್ ಇಲಾಖೆ ನಿರ್ಧರಿಸಿದೆ.

ಒಂದು ಪ್ರಕರಣದಲ್ಲಿ ಆರೋಪಿ ಯಾಗಿ ನ್ಯಾಯಾಲಯ ದಿಂದ ಜಾಮೀನು ಪಡೆದ ಬಳಿಕ ಮತ್ತೆ ಅಪರಾಧದಲ್ಲಿ ತೊಡಗಿಸಿ ಕೊಳ್ಳುತ್ತಿರುವುದು ಹೆಚ್ಚಾಗುತ್ತಿದ್ದು, ತಪ್ಪಿತಸ್ಥ ಭಾವನೆ ಎನ್ನುವುದು ಆರೋಪಿಗಳಲ್ಲಿ ಇಲ್ಲವಾಗಿದೆ. ಇದು ಅಪರಾಧ ಪ್ರಮಾಣ ಹೆಚ್ಚಲೂ ಕಾರಣವಾಗಿದೆ. ಆದ್ದರಿಂದ ಕೆ-ಕೋಕಾ ಕಾಯ್ದೆಯಡಿ ಪ್ರಕರಣ ದಾಖಲಿಸಿ, ಜಾಮೀನು ಸಿಗದಂತೆ ಮಾಡುವುದು ಪೊಲೀಸರ ಉದ್ದೇಶವಾಗಿದೆ.

ಆರು ಮಂದಿ ವಿರುದ್ಧ ಪ್ರಕರಣ:

ಈಗಾಗಲೇ ಆರು ಮಂದಿಯ ವಿರುದ್ಧ ಕೆ-ಕೋಕಾ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ. ವಿದೇಶ ಉದ್ಯೋಗದ ವೀಸಾ ಕೊಡಿಸುವುದಾಗಿ ನಂಬಿಸಿ ವಂಚಿಸಿದ ಪ್ರಕರಣದಲ್ಲಿ ಬಂಧಿತರಾದ ಮುಂಬಯಿ ಮೂಲದ ಇಬ್ಬರು ಆರೋಪಿಗಳ ಮತ್ತು ಜೈಲಿನಲ್ಲಿ ಸಹ ಕೈದಿಯಿಂದ ಹಣ ಸುಲಿಗೆ ಮಾಡಿದ ಪ್ರಕರಣದಲ್ಲಿ ನಾಲ್ಕು ಮಂದಿಯ ವಿರುದ್ಧ ಕೆ-ಕೋಕಾ ಪ್ರಕರಣ ದಾಖಲಾಗಿದೆ.

ಗ್ಯಾಂಗ್ ಜತೆ ಗುರುತಿಸಿಕೊಂಡರೂ ಶಿಕ್ಷೆ:

ಯಾವುದೇ ಪ್ರಕರಣ ಇಲ್ಲದೆಯೂ ಈಗಾಗಲೇ ಎರಡು ಪ್ರಕರಣಗಳಿರುವ ಆರೋಪಿಗಳ ಜತೆ ತಿರುಗುತ್ತಾ ಗುಂಪು ಕಟ್ಟಿಕೊಳ್ಳುವವರ ವಿರುದ್ಧ ಕೂಡಾ “ಮೆಂಬರ್ ಆಫ್ ಆರ್ಗನೈಸ್ಡ್ ಗ್ಯಾಂಗ್’ ಎನ್ನುವ ಸೆಕ್ಷನ್‌ನಡಿ ಕನಿಷ್ಠ 5 ವರ್ಷ ಶಿಕ್ಷೆಗೆ ಒಳಪಡಿಸಲು ಅವಕಾಶವಿದೆ. ಆರೋಪಿಗಳ ಜತೆ ಇದ್ದರೂ ಕೇಸು ಬೀಳುವುದು ಖಚಿತ ಎನ್ನುತ್ತಾರೆ ಪೊಲೀಸ್ ಕಮಿಷನರ್ ಸುಧೀರ್ ಕುಮಾರ್ ರೆಡ್ಡಿ.

ಜಾಮೀನು ಕೂಡಾ ಸಿಗದು:

ಸಂಘಟಿತ ಅಪರಾಧ ಮತ್ತು ಭಯೋತ್ಪಾದನೆ ತಡೆಯಲ್ಲು ರಾಜ್ಯದಲ್ಲಿ 2000ನೇ ಇಸವಿಯಲ್ಲಿ ಈ ಕಾಯ್ದೆಯನ್ನು ಜಾರಿಗೆ ಬಂದಿತು. ಕೆ-ಕೋಕಾ ಕಾಯ್ದೆಯಡಿ ಪೊಲೀಸರಿಗೆ ವಿಶೇಷ ಅಧಿಕಾರವೂ ಸಿಗುವುದರಿಂದ ಆರೋಪಿಗಳಿಗೆ ಜಾಮೀನು ಸಿಗುವುದು ಕಷ್ಟ. ಉದಾಹರಣೆಗೆ ಆರೋಪಿ ಈಗಾಗಲೇ ಮಾಡಿದ ಅಪರಾಧ ಪ್ರಕರಣಕ್ಕೆ ಗರಿಷ್ಠ 3 ವರ್ಷದ ಜೈಲು ಶಿಕ್ಷೆ ಇದೆ ಎಂದಾದರೆ ಕೆ-ಕೋಕಾ ಕಾಯ್ದೆಯಡಿ ಪ್ರಕರಣ ದಾಖಲಾದರೆ ಕನಿಷ್ಠ ೫ ವರ್ಷ ಜೈಲಿನಿಂದ ಜೀವಾವಧಿಯವರೆಗೂ ಶಿಕ್ಷೆ ಹೋಗಬಹುದು ಎನ್ನುತ್ತಾರೆ ಪೊಲೀಸರು.

ಒಬ್ಬ ಎರಡು ಪ್ರಕರಣದಲ್ಲಿ ಆರೋಪಿಯಾಗಿದ್ದು, ಮತ್ತೆ ಅಪರಾಧ ಕೃತ್ಯ ಮುಂದುವರಿಸಿ ಇನ್ನೊಂದು ಪ್ರಕರಣ ದಾಖಲಾದರೆ ಅದನ್ನು ಕೆ-ಕೋಕಾ ಅಡಿಯಲ್ಲಿ ದಾಖಲಿಸಲಾಗುವುದು. ಆ ಮೂಲಕ ಯಾವುದೇ ಜಾಮೀನು ಕೂಡಾ ಸಿಗದೆ ಗರಿಷ್ಠ ಶಿಕ್ಷೆಯಾಗುವಂತೆ ನೋಡಿಕೊಳ್ಳಲಾಗುವುದು ಎಂದು ಮಂಗಳೂರು ನಗರ ಪೊಲೀಸ್ ಆಯುಕ್ತ ಸುಧೀರ್ ಕುಮಾರ್ ರೆಡ್ಡಿ ಹೇಳಿದರು.