ಮಂಗಳೂರು: ರಾಷ್ಟ್ರೀಯ ತಾಂತ್ರಿಕ ಸಂಸ್ಥೆ ಕರ್ನಾಟಕ (ಎನ್‌ಐಟಿಕೆ), ಸುರತ್ಕಲ್‌ನಲ್ಲಿ ಮುಖ್ಯ ಕಟ್ಟಡದ ಮುಂಭಾಗದಲ್ಲಿ ಸ್ಥಾಪಿಸಲಾದ ಮಿಗ್-21 ವಿಮಾನವನ್ನು ಅ.6 ರಂದು ಅನಾವರಣಗೊಳಿಸಲಾಯಿತು.
ಸಮಾರಂಭದಲ್ಲಿ ಎನ್‌ಐಟಿಕೆಯ ಆಡಳಿತ ಮಂಡಳಿಯ ಅಧ್ಯಕ್ಷ ಎಂ.ಎಂ. ಮುರುಗಪ್ಪನ್ ಮಾತನಾಡಿ, ಅಪಾರ ಸಾಮರ್ಥ್ಯ ಹೊಂದಿರುವ ಎನ್‌ಐಟಿಕೆಯೊಂದಿಗೆ ನಂಟು ಹೊಂದಿರುವುದು ನನಗೆ ಗೌರವ ಮತ್ತು ಹೆಮ್ಮೆಯ ವಿಚಾರವಾಗಿದೆ. ನಮ್ಮ ವಿದ್ಯಾರ್ಥಿಗಳು, ಅಧ್ಯಾಪಕರು, ಹಳೆ ವಿದ್ಯಾರ್ಥಿಗಳು ಹಾಗೂ ಸಂಸ್ಥೆಯ ನಾಯಕತ್ವವು ದೇಶಕ್ಕೆ ಕೀರ್ತಿ ತಂದಿದ್ದು, ರಾಷ್ಟ್ರ ನಿರ್ಮಾಣದಲ್ಲಿ ಇನ್ನಷ್ಟು ಮಹತ್ವದ ಪಾತ್ರ ವಹಿಸಬೇಕಾಗಿದೆ. ಇದು ಶ್ರೇಷ್ಠತೆಯತ್ತ ನಿರಂತರವಾಗಿ ಸಾಧನೆ ಮಾಡುವ ಮನೋಭಾವದ ಮೂಲಕ ಮಾತ್ರ ಸಾಧ್ಯ. ಮಿಗ್-21 ವಿಮಾನದ ಸ್ಥಾಪನೆಯು ಮುಂದಿನ ಪೀಳಿಗೆಗಳಿಗೆ ಪ್ರೇರಣೆಯಾಗುವುದರ ಜೊತೆಗೆ, ಬಲಿಷ್ಠ ರಾಷ್ಟ್ರ ನಿರ್ಮಾಣಕ್ಕೆ ಅಗತ್ಯವಾದ ಶಿಸ್ತು, ಮೌಲ್ಯಗಳು ಮತ್ತು ಉದ್ದೇಶದ ಮಹತ್ವವನ್ನು ನೆನಪಿಸುವ ಸಂಕೇತವಾಗಲಿದೆ ಎಂದು ಹೇಳಿದರು.
ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಸಂಸದ ಕ್ಯಾ. ಬ್ರಿಜೇಶ್ ಚೌಟ ಮಾತನಾಡಿ, ದಕ್ಷಿಣ ಕನ್ನಡದ ಯುವಕರು ಹೆಚ್ಚುತ್ತಿರುವ ಸಂಖ್ಯೆಯಲ್ಲಿ ಸಶಸ್ತ್ರ ಪಡೆಗಳಲ್ಲಿ ಸೇವೆ ಸಲ್ಲಿಸಲು ಆಸಕ್ತಿ ತೋರುತ್ತಿರುವುದನ್ನು ಕಂಡು ನನಗೆ ಅತ್ಯಂತ ಸಂತೋಷವಾಗುತ್ತಿದೆ. ಈ ಬಗ್ಗೆ ಇನ್ನಷ್ಟು ಜಾಗೃತಿ ಮೂಡಿಸಿ, ಯುವಜನರಿಗೆ ಸೇನಾ ಸೇವೆಯ ಮೌಲ್ಯಗಳು, ಶಿಸ್ತು ಹಾಗೂ ಅವಕಾಶಗಳ ಬಗ್ಗೆ ಅರಿವು ಮೂಡಿಸಬೇಕಿದೆ. ಈ ಮಿಗ್-21 ವಿಮಾನದ ಸ್ಥಾಪನೆಯು ವಿದ್ಯಾರ್ಥಿಗಳಿಗೆ ಕೇವಲ ವಿಮಾನವನ್ನು ನೋಡುವ ಪ್ರೇರಣೆಯಷ್ಟೇ ಅಲ್ಲ, ಅದು ಪ್ರತಿನಿಧಿಸುವ ಸೇವಾ ಮನೋಭಾವ, ಶಿಸ್ತು ಮತ್ತು ಶ್ರೇಷ್ಠತೆಯ ಮೌಲ್ಯಗಳನ್ನು ಅಳವಡಿಸಿಕೊಳ್ಳುವ ಪ್ರೇರಣೆಯಾಗಬೇಕು ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಏರ್ ಮಾರ್ಷಲ್ ಬಿ.ಯು. ಚೆಂಗಪ್ಪ ಮಾತನಾಡಿ, ಈ ವಿಮಾನವು ಮಿಗ್-21ನ ಎರಡು ಆಸನಗಳ ತರಬೇತಿ ಆವೃತ್ತಿಯಾಗಿದ್ದು, ಟ್ಯಾಂಡಂ ಕಾಕ್‌ಪಿಟ್ ಹೊಂದಿದೆ. ಇದರಲ್ಲಿ ಆರ್-13 ಟರ್ಬೋಜೆಟ್ ಎಂಜಿನ್ ಅಳವಡಿಸಲಾಗಿತ್ತು. ಇದರ ಡೆಲ್ಟಾ ಆಕಾರದ ರೆಕ್ಕೆಗಳು ವಿಮಾನವನ್ನು ಚುರುಕು ಹಾಗೂ ಸ್ಥಿರವಾಗಿರಿಸುವುದರ ಜೊತೆಗೆ ವಾಯುಪಡೆಯ ತರಬೇತಿ ಪೈಲಟ್‌ಗಳಿಗೆ ಸುರಕ್ಷಿತವಾಗಿಯೂ ಮಾಡುತ್ತವೆ. ವಿಮಾನವು ಹೊರಾಂಗಣ ಗನ್ ಪಾಡ್ ಹಾಗೂ ರೆಕ್ಕೆಗಳ ಕೆಳಭಾಗದಲ್ಲಿ ಬಾಂಬ್‌ಗಳನ್ನು ಹೊತ್ತುಕೊಂಡು ಸಾಗುವ ಸಾಮರ್ಥ್ಯ ಹೊಂದಿತ್ತು. ಇದು ಸೆಪ್ಟೆಂಬರ್ 2025ರವರೆಗೆ ಭಾರತೀಯ ವಾಯುಪಡೆಯಲ್ಲಿ ಸಕ್ರಿಯ ಸೇವೆಯಲ್ಲಿದ್ದು, ಭಾರತೀಯ ವಾಯುಪಡೆ ಬಳಸಿದ ನೂರಕ್ಕೂ ಅಧಿಕ ತರಬೇತಿ ವಿಮಾನಗಳಲ್ಲಿ ಒಂದಾಗಿತ್ತು ಎಂದರು.
ಎನ್‌ಐಟಿಕೆ ಅಕಾಡೆಮಿ ಫಾರ್ ಡಿಫೆನ್ಸ್, ಅಡ್ವೆಂಚರ್ ಅಂಡ್ ಲೀಡರ್‌ಶಿಪ್ (ನಡಾಲ್)ನ ಪ್ರಭಾರ ಪ್ರಾಧ್ಯಾಪಕ ಡಾ. ಶ್ರೀನಿವಾಸ ರಾವ್ ಕೋಲಾ ಮಾತನಾಡಿ, ನಿವೃತ್ತ ವಿಮಾನವೊಂದನ್ನು ಒದಗಿಸುವಂತೆ ನಾವು ಭಾರತೀಯ ವಾಯುಪಡೆಯನ್ನು ಡಿಸೆಂಬರ್ 2023ರಲ್ಲಿ ಕೋರಿದ್ದೆವು. ಭಾರತೀಯ ವಾಯುಪಡೆಯು ಜನವರಿ 2026ರಲ್ಲಿ ಈ ವಿಮಾನವನ್ನು ಎನ್‌ಐಟಿಕೆಗೆ ಹಂಚಿಕೆ ಮಾಡಿದ್ದು, ಜುಲೈ 2026ರಲ್ಲಿ ಅದರ ವಿವಿಧ ಭಾಗಗಳನ್ನು ಸಾಗಿಸಿತು. ಆಗಸ್ಟ್‌ನಲ್ಲಿ ಭಾರತೀಯ ವಾಯುಪಡೆಯ ತಂಡವು ವಿಮಾನವನ್ನು ಮರುಜೋಡಿಸಿ, ಸೆಪ್ಟೆಂಬರ್ 2026ರಲ್ಲಿ ಅದರ ಸ್ಥಾಪನೆಗೆ ಮಾರ್ಗದರ್ಶನ ನೀಡಿತು. ಮುಖ್ಯ ಕಟ್ಟಡದ ಹಿಂಭಾಗದಲ್ಲಿ ಸ್ಥಾಪಿಸಲಾದ ಟರ್ಬೋಶಾಫ್ಟ್ ಎಂಜಿನ್ ಜೊತೆಗೆ ಈ ವಿಮಾನವು ನಡಾಲ್, ಎನ್‌ಸಿಸಿ ಹಾಗೂ ಇತರ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ವಿದ್ಯಾರ್ಥಿಗಳಿಗೆ ಪ್ರೇರಣೆಯಾಗಲಿದೆ ಎಂದು ಹೇಳಿದರು.
ಎನ್‌ಐಟಿಕೆಯ ನಿರ್ದೇಶಕ ಪ್ರೊ. ಬಿ. ರವಿ ಉಪಸ್ಥಿತರಿದ್ದರು. ಕಾರ್ಯಕ್ರಮದಲ್ಲಿ ಏರ್ ವಾರಿಯರ್ಸ್, ಸಶಸ್ತ್ರ ಪಡೆಗಳ ನಿವೃತ್ತ ಯೋಧರು, ಎನ್‌ಸಿಸಿ ಕೆಡೆಟ್‌ಗಳು, ಸಂಸ್ಥೆಯ ಅಧಿಕಾರಿಗಳು, ಅಧ್ಯಾಪಕರು, ಸಿಬ್ಬಂದಿ, ವಿದ್ಯಾರ್ಥಿಗಳು ಹಾಗೂ ಹಳೆ ವಿದ್ಯಾರ್ಥಿಗಳು ಭಾಗವಹಿಸಿದ್ದರು.
ಮಿಗ್-21 ಒಂದು ಅಧಿಧ್ವನಿಗತಿಯ (ಸೂಪರ್‌ಸಾನಿಕ್) ಯುದ್ಧ ವಿಮಾನ ಹಾಗೂ ಪ್ರತಿರೋಧಕ ವಿಮಾನವಾಗಿದ್ದು, 1950ರ ದಶಕದಲ್ಲಿ ಅಭಿವೃದ್ಧಿಪಡಿಸಲಾಯಿತು ಮತ್ತು 1963ರಲ್ಲಿ ಭಾರತೀಯ ವಾಯುಪಡೆಯಲ್ಲಿ ಸೇರ್ಪಡೆಗೊಂಡಿತು. ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಎಚ್‌ಎಎಲ್) ಸಂಸ್ಥೆಯು 1966ರಲ್ಲಿ ಸೋವಿಯತ್ ವಿನ್ಯಾಸ ಬ್ಯೂರೋದ ಪರವಾನಗಿಯಡಿ ನಾಸಿಕ್‌ನಲ್ಲಿ ಇದರ ತಯಾರಿಕೆಯನ್ನು ಆರಂಭಿಸಿತು. ಮಿಗ್-21 ವಿಮಾನವು 1965, 1971 ಹಾಗೂ 1999ರ ಯುದ್ಧಗಳಲ್ಲಿ ಭಾರತೀಯ ವಾಯುಪಡೆಯಲ್ಲಿ ಸೇವೆ ಸಲ್ಲಿಸಿದ್ದು, ಸೆಪ್ಟೆಂಬರ್ 2025ರಲ್ಲಿ ತನ್ನ ಅಂತಿಮ ಸಾಂಪ್ರದಾಯಿಕ ಹಾರಾಟ ಪೂರ್ಣಗೊಳಿಸುವವರೆಗೆ ಕಾರ್ಯಾಚರಣೆಯಲ್ಲಿತ್ತು.
