ಕೋಟ ವರುಣತೀರ್ಥ ಕೆರೆಯಲ್ಲಿ ಯುವಕ ನೀರುಪಾಲು

ಕೋಟ ವರುಣತೀರ್ಥ ಕೆರೆಯಲ್ಲಿ ಯುವಕ ನೀರುಪಾಲು


ಕುಂದಾಪುರ: ಬ್ರಹ್ಮಾವರ ತಾಲೂಕು ಕೋಟದ ಪ್ರಸಿದ್ಧ ಶ್ರೀ ರಾಜಶೇಖರ ದೇವಸ್ಥಾನದ ಬಳಿಯ ವರುಣತೀರ್ಥ ಕೆರೆಗೆ ಯುವಕನೊಬ್ಬ ಆಹುತಿಯಾದ ದುರ್ಘಟನೆ ಶನಿವಾರ ಸಂಭವಿಸಿದೆ. ವರುಣತೀರ್ಥ ಕೆರೆಯಲ್ಲಿ ಈಜಲು ಹೋಗಿ ನೀರಲ್ಲಿ ಮುಳುಗಿ ಮೃತಪಟ್ಟ ಯುವಕನನ್ನು ನಾಗರಾಜ್ (38)ಎಂದು ಗುರುತಿಸಲಾಗಿದೆ.

ಮೂಲತಃ ಗದಗ ಜಿಲ್ಲೆಯವರಾದ ಇವರು ಪ್ರಸ್ತುತ ಉಡುಪಿ ಜಿಲ್ಲೆಯ ಬ್ರಹ್ಮಾವರ ತಾಲೂಕಿನ ಸಾಸ್ತಾನ ಪಾಂಡೇಶ್ವರದ ಶ್ರೀ ಚೆನ್ನಕೇಶವ ದೇವಸ್ಥಾನದ ಸಮೀಪ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದರು.

ಘಟನೆಯ ವಿವರ: 

ಶನಿವಾರ ಬೆಳಿಗ್ಗೆ ನಾಗರಾಜ್ ತಮ್ಮ ಸ್ನೇಹಿತ ರಾಹುಲ್ ಜೊತೆ ಕೋಟ ಶ್ರೀ ಅಮೃತೇಶ್ವರೀ ದೇವಸ್ಥಾನಕ್ಕೆ ಆಗಮಿಸಿದ್ದರು. ದೇವರ ದರ್ಶನ ಪಡೆದು, ದೇವಸ್ಥಾನದ ಸಮೀಪದ ಶ್ರೀ ರಾಜಶೇಖರ ದೇವಸ್ಥಾನದ ಹಿಂಬದಿ ಇರುವ  ವರುಣತೀರ್ಥ ಕೆರೆಯಲ್ಲಿ ಈಜಲು  ನೀರಿಗೆ ಇಳಿದಿದ್ದರು. ಇವರ ಜೊತೆಯಿದ್ದ ರಾಹುಲ್ ಈಜು ಬಾರದ ಕಾರಣ ಕೆರೆಗೆ ಇಳಿಯದೆ ದಡದಲ್ಲೇ ನಿಂತಿದ್ದರು.

ಈಜುತ್ತಿದ್ದ ನಾಗರಾಜ್ ಅವರು ಕೆರೆಯ ಮಧ್ಯಭಾಗದಲ್ಲಿರುವ ಶಿವಲಿಂಗವನ್ನು ಮುಟ್ಟಿ ವಾಪಸ್ ಬರುವುದಾಗಿ ಹೇಳಿ ಆಳವಾದ ಪ್ರದೇಶದತ್ತ ತೆರಳಿದ್ದಾರೆ. ಆದರೆ ಕೆರೆಯ ಮಧ್ಯಭಾಗದಲ್ಲಿ ನೀರಿನ ಆಳ ಹೆಚ್ಚಾಗಿದ್ದರಿಂದ ಈಜಲಾಗದೆ ನೀರಿನಲ್ಲಿ ಮುಳುಗಿದ್ದಾರೆ ಎನ್ನಲಾಗಿದೆ.

ನಾಗರಾಜ್ ನೀರಿನಲ್ಲಿ ಮುಳುಗುವುದನ್ನು ಗಮನಿಸಿದ ರಾಹುಲ್ ಕೂಗಿಕೊಂಡಿದ್ದು, ತಕ್ಷಣ ಸ್ಥಳೀಯರು ರಕ್ಷಣೆಗೆ ಧಾವಿಸಿದ್ದಾರೆ.

ಸ್ಥಳೀಯರು ಕೆರೆಯಲ್ಲಿ ಹುಡುಕಾಟ ನಡೆಸಿದರೂ ಅಷ್ಟರಲ್ಲಾಗಲೇ ನಾಗರಾಜ್‌ ನೀರಿನಲ್ಲಿ ಮುಳುಗಿ ಕಾಣೆಯಾಗಿದ್ದರು. ಬಳಿಕ ಅವರ ಮೃತದೇಹವನ್ನು ಪತ್ತೆಮಾಡಿ ನೀರಿನಿಂದ ಮೇಲಕ್ಕೆತ್ತಲಾಯಿತು.

ಘಟನಾ ಸ್ಥಳಕ್ಕೆ ಅಗ್ನಿಶಾಮಕ ದಳದ ಸಿಬ್ಬಂದಿ ಹಾಗೂ ಮುಳುಗು ತಜ್ಞ ಈಶ್ವ‌ರ್ ಮಲ್ಪೆ ಆಗಮಿಸಿದ್ದರು. ಆದರೆ ಸ್ಥಳೀಯರು ಅದಕ್ಕೂ ಮೊದಲೇ ಮೃತದೇಹವನ್ನು ಪತ್ತೆಹಚ್ಚಿ ಮೇಲಕ್ಕೆತ್ತಿದ್ದರು.

ಪಾರ್ಥಿವ ಶರೀರವನ್ನು ಮರಣೋತ್ತರ ಪರೀಕ್ಷೆಗಾಗಿ ಬ್ರಹ್ಮಾವರಕ್ಕೆ ಸಾಗಿಸಲಾಗಿದೆ.  ಸ್ಥಳಕ್ಕೆ ಕೋಟ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

Ads on article

WhatsApp Image 2024-08-04 at 6.27.41 PM (1)

Advertise in articles 1

advertising articles 2

Advertise under the article