ರಾಜ್ಯದ ಭೂಪಟದಲ್ಲಿ ಶಾಶ್ವತ ಸ್ಥಾನ-ಸಾಧನೆಗೆ ದೊರೆತ ಮನ್ನಣೆ: ಸವಣೂರು ‘ಹೆಜ್ಜೆಗುರುತು’ಗೆ ಸಾಕ್ಷಿಯಾದ ಸಹಕಾರರತ್ನ ಸೀತಾರಾಮ ರೈ
7 ಬಾರಿ ಸಾಧನಾಪ್ರಶಸ್ತಿಯ ಗರಿ:
ಕಳೆದ 24 ವರ್ಷಗಳ ಸಾಧನೆಗೆ ಅವಿಭಜಿತ ದಕ ಜಿಲ್ಲೆಯ ಅತ್ಯುತ್ತಮ ಸಹಕಾರ ಸಂಘ ಪ್ರಶಸ್ತಿಯನ್ನು 2 ಬಾರಿ ಪಡೆದುಕೊಂಡ ಜತೆಗೆ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ನಿಯಮಿತ ನೀಡುವ ಸಾಧನಾ ಪ್ರಶಸ್ತಿಯನ್ನು 7 ಬಾರಿ ಬಾಚಿಕೊಂಡ ಹೆಗ್ಗಳಿಕೆಯೂ ಆದರ್ಶ ವಿವಿಧೋದ್ದೇಶ ಸಹಕಾರ ಸಂಘದ್ದಾಗಿದೆ. ಪುತ್ತೂರು, ಸುಳ್ಯ, ಸುಬ್ರಹ್ಮಣ್ಯ, ವಿಟ್ಲ, ಉಜಿರೆ, ಕಡಬ, ಸವಣೂರು, ಸಾಲೆತ್ತೂರು, ಕುಂಬ್ರ, ಬೆಳ್ಳಾರೆ, ಪಂಜ, ಬೊಳುವಾರು, ಮಡಂತ್ಯಾರು, ಬಿ.ಸಿ ರೋಡು, ಕಲ್ಲಡ್ಕ, ಮಂಗಳೂರಿನ ಪಾಂಡೇಶ್ವರ ಹಾಗೂ ಈಶ್ವರಮಂಗಲದಲ್ಲಿ ಆದರ್ಶ ವಿವಿಧೋದ್ದೇಶ ಸಹಕಾರ ಸಂಘದ ಶಾಖೆಗಳನ್ನು ತೆರೆಯುವ ಮೂಲಕ ಗ್ರಾಮೀಣ ಭಾಗದ ಜನತೆಯ ಆರ್ಥಿಕ ಭದ್ರತೆಗೆ ಸಾಕಷ್ಟು ಕೊಡುಗೆಗಳನ್ನು ನೀಡಿರುವುದು ಸವಣೂರು ಸೀತಾರಾಮ ರೈ ಅವರ ಸಹಕಾರಿ ಕ್ಷೇತ್ರದ ಸಾಧನೆ.
ಸಹಕಾರ ಕ್ಷೇತ್ರದ ಜತೆಗೆ ಸವಣೂರು ಎಂಬ ಹಳ್ಳಿಯನ್ನು ಸಮಾಜದ ಮುಖ್ಯವಾಹಿನಿಯಲ್ಲಿ ಸೇರ್ಪಡೆಗೊಳಿಸಿದ ಖ್ಯಾತಿಯೂ ಇವರಿಗೆ ಸಲ್ಲುತ್ತದೆ. ಗ್ರಾಮೀಣ ಭಾಗದ ಮಕ್ಕಳ ಶೈಕ್ಷಣಿಕ ಬದುಕಿಗೆ ಪ್ರೇರಣೆಯಾಗುವಂತೆ ವಿದ್ಯಾರಶ್ಮಿ ವಿದ್ಯಾಸಂಸ್ಥೆ ಶೈಕ್ಷಣಿಕ ಕ್ಷೇತ್ರಕ್ಕೆ ನೀಡಿದ ಕೊಡುಗೆಯಾಗಿದೆ. ಇದೀಗ ಪುತ್ತೂರಿನಲ್ಲಿದ್ದ ಆದರ್ಶ ವಿವಿಧೋದ್ದೇಶ ಸಹಕಾರ ಸಂಘದ ಕೇಂದ್ರ ಕಚೇರಿಯನ್ನೂ ಸವಣೂರಿಗೆ ಸ್ಥಳಾಂತರಿಸುವ ಅವರ ಕನಸು ಸೋಮವಾರ ನನಸಾಗಲಿದೆ.
ಅದಕ್ಕಾಗಿ ಸಂಘದ ಹೆಸರಲ್ಲಿ 1.29 ಕೋಟಿ ವೆಚ್ಚದಲ್ಲಿ ಸ್ಥಿರಾಸ್ತಿಯನ್ನು ಖರೀದಿ ಮಾಡಿ 5 ಕೋಟಿ ವೆಚ್ಚದ ಕೇಂದ್ರ ಕಚೇರಿ, ಸವಣೂರು ಶಾಖೆ, ವಾಣಿಜ್ಯ ಸಂಕೀರ್ಣದ ಲೋಕಾರ್ಪಣೆ ಸವಣೂರಿಗೆ ಮತ್ತಷ್ಟು ಹೆಗ್ಗಳಿಕೆಯನ್ನು ತರಲಿದೆ. ಆರ್ಥಿಕವಾಗಿ, ಸಾಮಾಜಿಕವಾಗಿ, ಶೈಕ್ಷಣಿಕವಾಗಿ ತನ್ನೂರನ್ನು ಬೆಳೆಸುವ ಸೀತಾರಾಮ ರೈ ಅವರ ಕನಸು ಸಂಘದ ರಜತಮಹೋತ್ಸವದ ಸಂದರ್ಭದಲ್ಲಿ ಈಡೇರಲಿದೆ ಎಂಬುವುದು ಸವಣೂರಿಗೆ ಹೆಮ್ಮೆ ತರಲಿದೆ.
