ದುಬೈ ನೋಂದಣಿಯ ಮೂರು ಕಾರು ಮಾಲೀಕರಿಗೆ ದಂಡ

ಉಡುಪಿ: ಮಣಿಪಾಲದ ರಾಜತಾದ್ರಿ ರಸ್ತೆಯಲ್ಲಿ ಅಜಾಗರೂಕವಾಗಿ ದೋಷಪೂರಿತ ಹಾರ್ನ್ ಮಾಡುವ ಮೂಲಕ ಚಲಾಯಿಸಿಕೊಂಡು ಹೋಗುತ್ತಿರುವ ಬಗ್ಗೆ ಸಾರ್ವಜನಿಕರಿಂದ ಬಂದ ದೂರಿನ ಹಿನ್ನೆಲೆಯಲ್ಲಿ ಪರಿಶೀಲಿಸಿದಾಗ, ಅವು ದುಬೈ ನೋಂದಾಯಿತ ಕಾರುಗಳೆಂದು ತಿಳಿದು ಬಂದಿದ್ದು, 3 ಕಾರುಗಳನ್ನು ಪೊಲೀಸರು ಫೆ.27ರಂದು ವಶಪಡಿಸಿಕೊಂಡಿದ್ದಾರೆ.

ದುಬೈ ನೋಂದಣಿಯ ಕಾರುಗಳ ದಾಖಲೆಗಳ ಪರಿಶೀಲನೆ ಬಗ್ಗೆ ಉಡುಪಿ ಆರ್.ಟಿ.ಓ ಅವರಿಗೆ ಪತ್ರ ಬರೆಯಲಾಗಿದ್ದು, ಆ ಮೂರೂ ಕಾರುಗಳ ಎಲ್ಲ ದಾಖಲಾತಿಗಳು ಕಾನೂನು ಬದ್ಧವಾಗಿರುವುದು ಕಂಡುಬಂದಿದೆ.

ಅಜಾಗರೂಕತೆಯ ಚಾಲನೆ ಹಾಗೂ ದೋಷಪೂರಿತ ಹಾರ್ನ್ ಬಳಸಿರುವ ಬಗ್ಗೆ ಪ್ರತೀ ಕಾರಿಗೆ ತಲಾ 1,500 ರೂ.ನಂತೆ ದಂಡ ವಿಧಿಸಿ, ಬಿಡುಗಡೆಗೊಳಿಸಲಾಗಿದೆ ಎಂದು ಶನಿವಾರ ಎಸ್.ಪಿ. ಡಾ. ಅರುಣ್ ಕುಮಾರ್ ತಿಳಿಸಿದ್ದಾರೆ.