ಸುಲಿಯಲು ಕೊಟ್ಟ ಅಡಿಕೆಯನ್ನು ವಂಚನೆಯಿಂದ ಕಳವು

ಬಂಟ್ವಾಳ: ಅಡಿಕೆ ತೋಟದ ಮಾಲೀಕ ಸುಲಿಯಲು ಕೊಟ್ಟ ಅಡಿಕೆಯನ್ನು ಕಾರ್ಮಿಕರು ವಂಚನೆಯಿಂದ ಕಳವುಗೈದ ಬಗ್ಗೆ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಈ ಬಗ್ಗೆ ತೋಟದ ಮಾಲಿಕ, ಮಣಿನಾಲ್ಕೂರು ಗ್ರಾಮದ ಪೂಂಜೂರು ನಿವಾಸಿ ಚಾಕೋ ವರ್ಗೀಸ್ ಎಂಬವರ ಪುತ್ರ ಅಜಿತ್ ಕೆ.ಸಿ. (47) ಅವರು ಪೊಲೀಸರಿಗೆ ದೂರು ನೀಡಿದ್ದಾರೆ.

ಇವರು ಮಣಿನಾಲ್ಕೂರು ಗ್ರಾಮದ ಪುಂಜೂರು ಎಂಬಲ್ಲಿ 3.48 ಎಕ್ರೆ ಹಾಗೂ ತನ್ನ ಹೆಂಡತಿಯ ಹೆಸರಿನಲ್ಲಿ 3.45 ಎಕ್ರೆ ಜಮೀನು ಹೊಂದಿದ್ದು, ಸುಮಾರು 20 ಕೆಜಿ ತೂಕದ ಪ್ಲಾಸ್ಟಿಕ್ ಚೀಲದಲ್ಲಿ ತುಂಬಿಸಿಟ್ಟಿದ್ದ ಅಡಿಕೆಯನ್ನು ಸುಲಿಯಲೆಂದು ಜೂನ್ ಮೊದಲ ವಾರದಲ್ಲಿ ಪರಿಚಯದ ಸುಳ್ಯ ನಿವಾಸಿ ಸಂದೀಪ್ ಎಂಬವರಿಗೆ ವಹಿಸಿಕೊಟ್ಟಿದ್ದರು.

ಆತ ಸುಧಾಕರ ಮತ್ತು ಇತರೆ ಐವರನ್ನು ಕರೆದುಕೊಂಡು ಬಂದು ಮಣಿನಾಲ್ಕೂರು ಗ್ರಾಮದ ಪೂಂಜೂರು ಎಂಬಲ್ಲಿರುವ ಅಜಿತ್ ಕೆ.ಸಿ. ಅವರ ಮನೆಯ ಬಳಿ ಅಡಿಕೆಯನ್ನು ಸುಲಿಯುತ್ತಿದ್ದರು. ಜೂನ್ ತಿಂಗಳಿನಲ್ಲಿ ಒಟ್ಟು ಸುಮಾರು 300 ಪ್ಲಾಸ್ಟಿಕ್ ಚೀಲ ಅಡಿಕೆಯನ್ನು ಸುಲಿಯಲು ನೀಡಿದ್ದು ಅದನ್ನು ಸುಲಿದು ಕೊಟ್ಟಿರುತ್ತಾರೆ. 

ಅಜಿತ್ ಅವರು ಪ್ರತಿದಿನ ಸುಲಿದ ಅಡಿಕೆಯನ್ನು ತೂಕ ಮಾಡಿಕೊಂಡು ಪಡೆದುಕೊಂಡಿರುತ್ತಾರೆ.

ಜುಲೈ ತಿಂಗಳ ಪ್ರಾರಂಭದಲ್ಲೇ ಅಜಿತ್ ಅವರು ಮತ್ತೆ 100 ಪ್ಲಾಸ್ಟಿಕ್ ಚೀಲ ಅಡಿಕೆಯನ್ನು ಸುಲಿಯಲು ನೀಡಿದ್ದು, ಜುಲೈ 3 ರಂದು ಬೆಳಿಗ್ಗೆ ಸುಲಿಯಲು ಬಾಕಿ ಇರುವ ಅಡಿಕೆಯ ಪ್ಲಾಸ್ಟಿಕ್ ಚೀಲಕ್ಕೂ ಮತ್ತು ಸುಲಿದ ಅಡಿಕೆಯ ತೂಕಕ್ಕೂ ಹೊಂದಾಣಿಕೆ ಮಾಡಿದಾಗ ಇದರಲ್ಲಿ ಸುಲಿದ ಅಡಿಕೆ ತೂಕವು ಕಡಿಮೆ ಬಂದಿದೆ.

12 ಪ್ಲಾಸ್ಟಿಕ್ ಚೀಲ ಅಡಿಕೆ ಕಾಣೆಯಾಗಿರುವುದು ಕಂಡು ಬಂದಿದೆ. ಅಜಿತ್ ಅವರು ಮತ್ತೆ ಜುಲೈ ತಿಂಗಳಿನಲ್ಲಿ 200 ಪ್ಲಾಸ್ಟಿಕ್ ಚೀಲ ಅಡಿಕೆಯನ್ನು ಸುಲಿಯಲು ಕೊಟ್ಟಿದ್ದು, ಬಾಕಿ ಉಳಿದ ಒಣ ಅಡಿಕೆ ಪ್ಲಾಸ್ಟಿಕ್ ಚೀಲಗಳಿಗೆ ಮತ್ತು ಅವರು ಸುಲಿದು ನೀಡಿದ ಅಡಿಕೆಯನ್ನು ಜುಲೈ 22 ರಂದು ತಾಳೆ ಮಾಡಿ ನೋಡಿದಾಗ ಅದರಲ್ಲಿ 33 ಪ್ಲಾಸ್ಟಿಕ್ ಚೀಲ ಒಣ ಅಡಿಕೆ ಕಾಣೆಯಾಗಿರುವುದು ಕಂಡು ಬಂದಿದೆ. ಅಜಿತ್ ಅವರ ಮನೆಯಲ್ಲಿ ಸಂಗ್ರಹಿಸಿಟ್ಟಿದ್ದ ಅಡಿಕೆಯನ್ನು ಸುಲಿಯುವ ಕೆಲಸ ಮಾಡಿಕೊಂಡಿದ್ದ ಸುಧಾಕರ ಎಂಬಾತ ಇತರರೊಂದಿಗೆ ಸೇರಿಕೊಂಡು 2.20 ಲಕ್ಷ ರೂ. ಮೌಲ್ಯದ ಒಟ್ಟು 45 ಪ್ಲಾಸ್ಟಿಕ್ ಚೀಲದ 9 ಕ್ವಿಂಟಾಲ್ ಒಣ ಅಡಿಕೆಯನ್ನು ಕಳವು ಮಾಡಿರುತ್ತಾರೆ ಎಂದು ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ.

ಈ ಬಗ್ಗೆ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.