ಮಂಗಳೂರು ಆವಿಷ್ಕಾರಕ್ಕೆ ಜನಪ್ರಿಯ ಕೇಂದ್ರ: ಮೋಹನ್ದಾಸ್ ಪೈ ಪೋಸ್ಟ್ಗೆ ಸುನಿಲ್ ಶೆಟ್ಟಿ ಭಾವನಾತ್ಮಕ ಪ್ರತಿಕ್ರಿಯೆ
ಮಂಗಳೂರು: ಪ್ರಸಿದ್ಧ ಉದ್ಯಮಿ, ಸೆಬಿ ಮಂಡಳಿ ಸದಸ್ಯ ಮತ್ತು ಮಣಿಪಾಲ್ ಗ್ಲೋಬಲ್ ಎಜುಕೇಶನ್ ಸರ್ವಿಸಸ್ ಪ್ರೈವೇಟ್ ಲಿಮಿಟೆಡ್ನ ಅಧ್ಯಕ್ಷ ಟಿ. ವಿ. ಮೋಹನ್ ದಾಸ್ ಪೈ ಮಂಗಳೂರಿನ ಬೆಳವಣಿಗೆ ಮತ್ತು ಆವಿಷ್ಕಾರ ಶಕ್ತಿಯ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಬರೆದ ಪೋಸ್ಟ್ ಇದೀಗ ಚರ್ಚೆಯ ಕೇಂದ್ರವಾಗಿದೆ. ಆ ಪೋಸ್ಟ್ಗೆ ಬಾಲಿವುಡ್ ನಟ ಸುನಿಲ್ ಶೆಟ್ಟಿ ಭಾವನಾತ್ಮಕವಾಗಿ ಪ್ರತಿಕ್ರಿಯಿಸಿ, “ಮಂಗಳೂರು ಭಾರತದಲ್ಲಿ ಮಾತ್ರವಲ್ಲ, ಇಡೀ ಏಷ್ಯಾದಲ್ಲಿಯೂ ಆವಿಷ್ಕಾರ ಮತ್ತು ಆತ್ಮೀಯತೆಯ ತಾಣವಾಗಲಿದೆ” ಎಂದು ಹೇಳಿದ್ದಾರೆ.
ಮೋಹನ್ ದಾಸ್ ಪೈ ಅವರು ತಮ್ಮ ಎಕ್ಸ್ (ಹಳೆಯ ಟ್ವಿಟ್ಟರ್) ಖಾತೆಯಲ್ಲಿ ಮಂಗಳೂರಿನ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿ, “ಮಂಗಳೂರು ಭಾರತದಲ್ಲಿ ಆವಿಷ್ಕಾರಕ್ಕೆ ಮುಂದಿನ ಜನಪ್ರಿಯ ಕೇಂದ್ರವಾಗುತ್ತಿದೆ. ಉತ್ತಮ ಪ್ರತಿಭೆ, ಉತ್ತಮ ಜೀವನಮಟ್ಟ, ಕೈಗೆಟುಕುವ ವಸತಿ, ಉನ್ನತ ಶಿಕ್ಷಣದ ಕೇಂದ್ರ, ಸ್ನೇಹಪರ ಜನರು, ಉತ್ತಮ ಆಹಾರ ಮತ್ತು ಈಗ ಹೊಸ ಕೆಲಸದ ಸ್ಥಳಗಳು ಆರಂಭವಾಗುತ್ತಿವೆ. ಈಗಾಗಲೇ ಸುಮಾರು 25,000 ಟೆಕ್ ತಜ್ಞರು ಇಲ್ಲಿದ್ದಾರೆ. ಉತ್ತಮ ಕಡಲತೀರಗಳು ಮತ್ತು ರೆಸಾರ್ಟ್ಗಳು ಮಂಗಳೂರನ್ನು ವಿಭಿನ್ನ ನಗರವಾಗಿಸುತ್ತಿವೆ,” ಎಂದು ಬರೆದಿದ್ದರು.
ಇದಕ್ಕೆ ಪ್ರತಿಕ್ರಿಯಿಸಿದ ನಟ ಸುನಿಲ್ ಶೆಟ್ಟಿ, ತಮ್ಮ ಅಧಿಕೃತ ಎಕ್ಸ್ ಖಾತೆಯಲ್ಲಿ ಪೈ ಅವರ ಪೋಸ್ಟ್ನ್ನು ಹಂಚಿಕೊಂಡು, “ಪೈ ಸರ್, ನೀವು ಹೇಳಿದುದನ್ನು ಸಂಪೂರ್ಣವಾಗಿ ಒಪ್ಪುತ್ತೇನೆ. ಮಂಗಳೂರು ಮುಂದಿನ ಜನಪ್ರಿಯ ತಾಣ ಮಾತ್ರವಲ್ಲ, ಇದು ತಂತ್ರಜ್ಞರು, ಯುವ ಉದ್ಯಮಿಗಳು ಮತ್ತು ಉತ್ತಮ ಜೀವನದ ಹುಡುಕಾಟದಲ್ಲಿರುವವರಿಗೆ ತಾಣವಾಗಲಿದೆ. ಭಾರತದಲ್ಲಿ ಮಾತ್ರವಲ್ಲ, ಇಡೀ ಏಷ್ಯಾದಲ್ಲಿಯೂ ಮಂಗಳೂರು ವಿಶಿಷ್ಟ ಸ್ಥಳವಾಗಿ ಹೊರಹೊಮ್ಮಲಿದೆ. ಮತ್ತು ಇದರಿಗಿಂತ ಹೆಚ್ಚಾಗಿ, ಇದು ನಿಮ್ಮ ಆತ್ಮವನ್ನು ತಟ್ಟುವ ಆಧ್ಯಾತ್ಮಿಕ, ಭಾವಪೂರ್ಣ ಸ್ಥಳವಾಗುತ್ತದೆ.’ ಎಂದಿದ್ದಾರೆ.
ಈ ಪೋಸ್ಟ್ ಸಾವಿರಾರು ಜನರಿಂದ ಮೆಚ್ಚುಗೆ ಗಳಿಸಿದ್ದು, ಮಂಗಳೂರಿನ ಅಭಿವೃದ್ಧಿ, ತಂತ್ರಜ್ಞಾನ ಕ್ಷೇತ್ರದಲ್ಲಿ ಬೆಳೆಯುತ್ತಿರುವ ಅವಕಾಶಗಳು ಮತ್ತು ಜೀವನಮಟ್ಟದ ಕುರಿತ ಚರ್ಚೆಗಳನ್ನು ಪುನಃ ಬೆಳಕಿಗೆ ತಂದಿದೆ.
ಮಂಗಳೂರು ಈಗಾಗಲೇ ಭಾರತದ ಉನ್ನತ ಶಿಕ್ಷಣದ ತೊಟ್ಟಿಲುಗಳಲ್ಲೊಂದು ಎಂದು ಪರಿಗಣಿಸಲ್ಪಟ್ಟಿದೆ. ಅನೇಕ ಎಂಜಿನಿಯರಿಂಗ್, ಮೆಡಿಕಲ್ ಮತ್ತು ಮ್ಯಾನೇಜ್ಮೆಂಟ್ ಸಂಸ್ಥೆಗಳು ಇಲ್ಲಿ ನೆಲೆಗೊಂಡಿದ್ದು, ಐಟಿ ಹಾಗೂ ಸ್ಟಾರ್ಟ್ಅಪ್ ಕ್ಷೇತ್ರಗಳು ವೇಗವಾಗಿ ಬೆಳೆಯುತ್ತಿವೆ.
ನಗರದ ಶಾಂತ ವಾತಾವರಣ, ಕಡಲತೀರಗಳು ಮತ್ತು ಜೀವನಮಟ್ಟವು ಯುವ ವೃತ್ತಿಪರರನ್ನು ಆಕರ್ಷಿಸುತ್ತಿರುವ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ಸುನಿಲ್ ಶೆಟ್ಟಿ ಅವರ ಈ ಹೇಳಿಕೆ ಮಂಗಳೂರಿನ ಅಭಿವೃದ್ಧಿಯ ಕುರಿತು ರಾಷ್ಟ್ರೀಯ ಮಟ್ಟದಲ್ಲಿ ಹೊಸ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ.
