ಸಂತ ಫಿಲೋಮಿನಾ ಕಾಲೇಜಿನಲ್ಲಿ ವರ್ಡ್ ಪ್ರೆಸ್ ಕುರಿತು ಎರಡು ದಿನಗಳ ಕಾರ್ಯಗಾರ

ಪುತ್ತೂರು: ಸಂತ ಫಿಲೋಮಿನಾ ಕಾಲೇಜುನ ಸ್ನಾತಕೋತ್ತರ ಕಂಪ್ಯೂಟರ್ ಅಪ್ಲಿಕೇಶನ್ ವಿಭಾಗ ಹಾಗೂ ನ್ಯೂ ಏಜ್ ಇನ್ಕ್ಯುಬೇಶನ್ ಸಂಟರ್ ಹಾಗೂ ವರ್ಡ್ ಪ್ರೆಸ್ ಕಮ್ಯುನಿಟಿ ಉಡುಪಿ ಇವರ ಸಹಯೋಗದೊಂದಿಗೆ ಬಿಲ್ಡಿಂಗ್ ವೆಬ್‌ಆಯಪ್ಸ್ ವಿತ್ ವರ್ಡ್ ಪ್ರೆಸ್ ಎಂಬ ಎರಡು ದಿನಗಳ ಕಾರ್ಯಗಾರವನ್ನು ಆಯೋಜಿಸಲಾಯಿತು. ಕಾರ್ಯಗಾರದ ಉದ್ಘಾಟನೆಯನ್ನು ಕಾಲೇಜಿನ ಸ್ನಾತಕೋತ್ತರ ಸಭಾಭವನದಲ್ಲಿ ಆಯೋಜಿಸಲಾಯಿತು. 

ಕಾಲೇಜಿನ ಪ್ರಾಶುಪಾಲರಾದ  ವಂ. ಡಾ. ಆಂಟನಿ ಪ್ರಕಾಶ್ ಮೊಂತೇರೊರವರು, ಉಡುಪಿಯ ವರ್ಡ್ ಪ್ರೆಸ್ ಕಮ್ಯುನಿಟಿಯ ಸದಸ್ಯರಾದ ಮಂಜುನಾಥ್ ಎಂ ಎಂ ಹಾಗೂ ಓಂಕಾರ್ ಉಡುಪ ಇವರುಗಳು ದೀಪ ಬೆಳಗಿಸುವುದರ ಮೂಲಕ ಕಾರ್ಯಗಾರವನ್ನು ಉದ್ಘಾಟಿಸಿದರು. 

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ವಂ. ಡಾ. ಆಂಟನಿ ಪ್ರಕಾಶ್ ಮೊಂತೇರೊರವರು “ ಆಧುನಿಕ  ಯುಗದಲ್ಲಿ ನಾವೀನ್ಯತೆಯು ಪ್ರಮುಖವಾದ ಅಂಶವಾಗಿದೆ. ಒಂದು ಕಲ್ಪನೆಯನ್ನು ಅರ್ಥಪೂರ್ಣ ಪರಿಹಾರವಾಗಿ ರೂಪಾಂತರಿಸಲು ಕೇವಲ ಸೃಜನಶೀಲತೆ ಹಾಗೂ ಅನುಕೂಲಕರ ವಾತಾವರಣ  ಅಗತ್ಯ. ಕಾಲೇಜಿನಲ್ಲಿ  ಪ್ರಯೋಗ, ಸಹಕಾರ ಮತ್ತು ನಿರಂತರ ಕಲಿಕೆಯನ್ನು ಉತ್ತೇಜಿಸುವ ಸಂಸ್ಕೃತಿಯನ್ನು  ಅಳವಡಿಸಿಕೊಳ್ಳಲಾಗಿದೆ. ಶೈಕ್ಷಣಿಕ, ತಾಂತ್ರಿಕ ಹಾಗೂ ಸಹಪಠ್ಯ ಚಟುವಟಿಕೆಗಳ ಮೂಲಕ ವಿದ್ಯಾರ್ಥಿಗಳ ಕೌಶಲ್ಯಗಳನ್ನು ಹೆಚ್ಚಿಸಲು ಕಾಲೇಜು  ಸಾಧ್ಯವಾದ ಎಲ್ಲಾ ಮಾರ್ಗಗಳನ್ನು ಪ್ರಾಮಾಣಿಕವಾಗಿ ಒದಗಿಸುತ್ತಿದೆ. ಈ ರೀತಿಯಾಗಿ ಒದಗಿಸಿದ ಅವಕಾಶಗಳನ್ನು   ವಿದ್ಯಾರ್ಥಿಗಳು ಸಕ್ರಿಯವಾಗಿ ಬಳಸಿಕೊಳ್ಳಬೇಕು.  ಕಲಿಕೆಯಲ್ಲಿ ನಿಜವಾದ ಆಸಕ್ತಿ, ಕುತೂಹಲ, ಸಕ್ರಿಯತೆ ಮತ್ತು ಬದ್ಧತೆಯನ್ನು ಕಾಯ್ದುಕೊಳ್ಳಬೇಕು ಎಂದು ಹೇಳಿದರು. 

ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ವರ್ಡ್ ಪ್ರೆಸ್ ಕಮ್ಯುನಿಟಿಯ ಸದಸ್ಯರಾದ ಮಂಜುನಾಥ್ ಎಂ ಎಂರವರು     ವರ್ಡ್ ಪ್ರೆಸ್ ಕುರಿತಾದ ಕಾರ್ಯಗಾರವನ್ನು ಆಯೋಜಿಸಿದುದಕ್ಕೆ ಅಭಿನಂದಿಸಿ ವರ್ಡ್ ಪ್ರೆಸ್ನ ಪ್ರಾಮುಖ್ಯತೆಯ ಬಗ್ಗೆ ತಿಳಿಸಿ ಕಾರ್ಯಗಾರದಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವಂತೆ ವಿದ್ಯಾರ್ಥಿಗಳಿಗೆ ಕರೆನೀಡಿದರು. 

ಪ್ರಥಮ ಎಂಸಿಎ ವಿದ್ಯಾರ್ಥಿನಿ  ಡೆಲಿಶಾ ಮತ್ತು ಬಳಗ ಪ್ರಾರ್ಥಿಸಿದರು. ಕಾಲೇಜಿನ ಸ್ನಾತಕೋತ್ತರ ಕಂಪ್ಯೂಟರ್ ಅಪ್ಲಿಕೇಶನ್ ವಿಭಾಗದ ಡೀನ್ ಡಾ. ವಿನಯಚಂದ್ರ ಸ್ವಾಗತಿಸಿ ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ಕಂಪ್ಯೂಟರ್ ಅಪ್ಲಿಕೇಶನ್ ವಿಭಾಗದ ಸಹಾಯಕ ಪ್ರಾಧ್ಯಾಪಕಿ ಅಕ್ಷತಾ ಬಿ ವಂದಿಸಿದರು. 

ದ್ವಿತೀಯ ಎಂಸಿಎ ವಿದ್ಯಾರ್ಥಿನಿ ಅಪೂರ್ವ ಕೆ ಕಾರ್ಯಕ್ರಮ ನಿರೂಪಿಸಿದರು. ನ್ಯೂ ಏಜ್ ಇನ್ಕ್ಯುಬೇಶನ್ ಸಂಟರ್ನ ಡಿಸ್ಟ್ರಿಕ್ಟ್ ಇನ್ನೊವೇಟಿವ್ ಅಸೋಸಿಯೇಟ್ ಅಭಿಷೇಕ್ ಸುವರ್ಣ ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಕಂಪ್ಯೂಟರ್ ಅಪ್ಲಿಕೇಶನ್ ವಿಭಾಗದ ಸಹಾಯಕ ಪ್ರಾಧ್ಯಾಪಕರಾದ ಶೋಧನ್ ಪಿ ಜಿ ಸಹಕಾರ ನೀಡಿದರು.