ಪ್ರಥಮ ಬ್ಯಾಟರಿ ಇಂಧನ ಸಂಗ್ರಹ ವ್ಯವಸ್ಥೆ ಪೂರ್ಣ
ಮುಲ್ಲೇರಿಯಾ ಸಬ್ ಸ್ಟೇಷನ್ ಪಕ್ಕದ ಒಂದು ಎಕರೆ ಕೆಎಸ್‌ಇಬಿ ಭೂಮಿಯಲ್ಲಿ ಕೇವಲ ಒಂದು ವರ್ಷದ ಅವಧಿಯಲ್ಲಿ ಈ 15 ಮೆಗಾವ್ಯಾಟ್ (MW) ಸಾಮರ್ಥ್ಯದ ಸೌಲಭ್ಯವನ್ನು ನಿರ್ಮಿಸಲಾಗಿದೆ. ಕಳೆದ ಎರಡು ದಿನಗಳಲ್ಲಿ ಈ ವ್ಯವಸ್ಥೆಯು ರಾತ್ರಿಯ ಗರಿಷ್ಠ ಬೇಡಿಕೆಯ ಸಮಯದಲ್ಲಿ ಬರೋಬ್ಬರಿ 60 ಮೆಗಾವ್ಯಾಟ್-ಗಂಟೆಗಳ (MWh) ವಿದ್ಯುತ್ ಅನ್ನು ಗ್ರಿಡ್ಗೆ ಯಶಸ್ವಿಯಾಗಿ ಬಿಡುಗಡೆ ಮಾಡಿದೆ. ಈ ಸ್ಥಾವರವು ಒಟ್ಟು 14 ಕಂಟೇನರೈಸ್ಡ್ ಬ್ಯಾಟರಿ ಘಟಕಗಳು, 7 ವಿದ್ಯುತ್ ಪರಿವರ್ತಕ ವ್ಯವಸ್ಥೆಗಳು ಹಾಗೂ 2 ಟ್ರಾನ್ಸ್‌ಫಾರ್ಮರ್‌ಗಳನ್ನು ಒಳಗೊಂಡಿದೆ. ನಾಲ್ಕು ಗಂಟೆಗಳ ಕಾಲ ನಿರಂತರವಾಗಿ 15 ಮೆಗಾವ್ಯಾಟ್ ವಿದ್ಯುತ್ ಪೂರೈಸಲು ವಿನ್ಯಾಸಗೊಳಿಸಲಾದ ಈ ಸೌಲಭ್ಯವು: ಕೇಂದ್ರ ಗ್ರಿಡ್‌ನಿಂದ ಹಗಲಿನಲ್ಲಿ ಲಭ್ಯವಿರುವ ಕಡಿಮೆ ವೆಚ್ಚದ ವಿದ್ಯುತ್ ಹಾಗೂ ಅಂಬಲಥರ ಮತ್ತು ಪೈವಳಿಕೆ ಸೌರ ಉದ್ಯಾನವನಗಳ ಹೆಚ್ಚುವರಿ ಉತ್ಪಾದನೆಯನ್ನು ಶೇಖರಿಸಿಡುತ್ತದೆ.
ವಿದ್ಯುತ್ ಮಾರುಕಟ್ಟೆ ಬೆಲೆ ಗಗನಕ್ಕೇರುವ ಸಂಜೆ ಹಾಗೂ ರಾತ್ರಿಯ ಪೀಕ್ ಅವರ್ನಲ್ಲಿ ಈ ಸಂಗ್ರಹಿತಕ್ತಿಯನ್ನು ಗ್ರಿಡ್ಗೆ ಮರಳಿಸುತ್ತದೆ. ಕೇರಳದಲ್ಲಿ ಹೆಚ್ಚುತ್ತಿರುವ ವಿದ್ಯುತ್ ಬೇಡಿಕೆ ಹಾಗೂ ಪೀಕ್ ಅವರ್ ಕೊರತೆಯನ್ನು ನೀಗಿಸಲು ಈ ಯೋಜನೆ ಅತ್ಯಂತ ನಿರ್ಣಾಯಕವಾಗಿದೆ. ಕೇಂದ್ರ ಸಾರ್ವಜನಿಕ ವಲಯದ ಸಂಸ್ಥೆಯಾದ ರಾಷ್ಟ್ರೀಯ ಜಲವಿದ್ಯುತ್ ಪವರ್ ಕಾರ್ಪೊರೇಷನ್ (NHPC) ಆಶ್ರಯದಲ್ಲಿ ಅಭಿವೃದ್ಧಿಪಡಿಸಿರುವ ಈ ಯೋಜನೆಯನ್ನು, ಗುಜರಾತ್ ಮೂಲದ ‘ಒಪೇರಾ ಗ್ರೀನ್ ಯಾನಾ ಪ್ರೈವೇಟ್ ಲಿಮಿಟೆಡ್’ ಕಾರ್ಯಗತಗೊಳಿಸಿದೆ. ಕೆಎಸ್‌ಇಬಿಗೆ ಉಚಿತವಾಗಿ ಭೂಮಿ ಒದಗಿಸಿರುವ ಈ ಯೋಜನೆಯಲ್ಲಿ ಯಾವುದೇ ಬಂಡವಾಳ ವೆಚ್ಚವಿಲ್ಲ.
ಒಪ್ಪಂದದ ಪ್ರಕಾರ, ರಾತ್ರಿಯಲ್ಲಿ ಸಂಗ್ರಹಿಸುವ ಶಕ್ತಿಗಾಗಿ ಕೆಎಸ್‌ಇಬಿ ಸಂಸ್ಥೆಗೆ ಪ್ರತಿ ಯೂನಿಟ್‌ಗೆ 4.38 ಪಾವತಿಸಲಿದೆ. ಇದು ಪ್ರಸ್ತುತ ಪೀಕ್ ಅವರ್ನಲ್ಲಿ ಬಾಹ್ಯ ವಿದ್ಯುತ್ ಖರೀದಿಸಲು ಪಾವತಿಸುತ್ತಿರುವ ಅತಿಯಾದ ದರಗಳಿಗಿಂತ ಅತ್ಯಂತ ಮಿತವ್ಯಯಕಾರಿಯಾಗಿದೆ. ಮೈಲಟ್ಟಿಯಲ್ಲಿ ಯೋಜಿಸಲಾಗಿರುವ 125 MW BESS ಘಟಕವು ಚೀನಾದಿಂದ ಆಮದು ಮಾಡಿಕೊಳ್ಳಬೇಕಾದ ಬ್ಯಾಟರಿ ಸಾಗಣೆ ವಿಳಂಬದಿಂದ ಹಿನ್ನಡೆ ಅನುಭವಿಸಿದ್ದರೂ, ಮುಲ್ಲೇರಿಯಾ ಸ್ಥಾವರವು ನಿಗದಿತ ವೇಳಾಪಟ್ಟಿಯಂತೆಯೇ ಪೂರ್ಣಗೊಂಡಿದೆ. ಕಲಾಮಸ್ಸೇರಿಯಲ್ಲಿರುವ ಕೆಎಸ್‌ಇಬಿಯ ರಾಜ್ಯ ಲೋಡ್ ಡಿಸ್ಪ್ಯಾಚ್ ಕೇಂದ್ರದಿಂದ ಅಂತಿಮ ಕಾರ್ಯಾಚರಣೆಯ ಅನುಮತಿ ದೊರೆಯಷ್ಟೇ ಬಾಕಿ ಇದೆ. ಪ್ರಸ್ತುತ ಪರಿಧಿ ಬೇಲಿ ನಿರ್ಮಾಣದಂತಹ ಸಣ್ಣಪುಟ್ಟ ಕೆಲಸಗಳು ನಡೆಯುತ್ತಿದ್ದು, ಒಂದು ತಿಂಗಳೊಳಗೆ ಈ ಸೌಲಭ್ಯವು ಅಧಿಕೃತವಾಗಿ ಲೋಕಾರ್ಪಣೆಗೊಳ್ಳುವೆ.
