ವರ್ಷಿತ್ ಕುತ್ತಾರ್ ನೆನಪಿನಲ್ಲಿ ಕುತ್ತಾರ್ ಡಿವೈಎಫ್ಐ ಜನಜಾಗೃತಿ

ಮಂಗಳೂರು: ಭಾರತ ಪ್ರಜಾಸತ್ತಾತ್ಮಕ ಯುವಜನ ಫೆಡರೇಷನ್ ಡಿವೈಎಫ್ಐನ ಕಾರ್ಯಕರ್ತ ವರ್ಷಿತ್ ಕುತ್ತಾರ್ ತನ್ನ ಸಾವಿನಲ್ಲೂ ಅಂಗಾಂಗ ದಾನ ಮಾಡುವ ಮೂಲಕ ಸಾರ್ಥಕತೆ ಮೆರೆದಿದ್ದು ಇವರ ನೆನಪಿನಲ್ಲಿ ಭಾರತ ಪ್ರಜಾಸತ್ತಾತ್ಮಕ ಯುವಜನ ಫೆಡರೇಶನ್ ಡಿ ವೈ ಎಫ್ ಐ ಕುತ್ತಾರು ಬಟ್ಟೆದಡಿ ಘಟಕವು ಅಂಗಾಂಗ ದಾನ ಮತ್ತು ಸಂಚಾರಿ ನಿಯಮಗಳ ಕುರಿತಾದ ಜನಜಾಗೃತಿ ಸಭೆಯನ್ನು ಕುತ್ತಾರು ಬಟ್ಟೆದಡಿಯಲ್ಲಿ ಹಮ್ಮಿಕೊಂಡಿತು. 

ಭಾರತ ಪ್ರಜಾಸತ್ತಾತ್ಮಕ ಯುವಜನ ಫೆಡರೇಶನ್ ಡಿ ವೈ ಎಫ್ ಐ ನ ರಾಜ್ಯ ಕಾರ್ಯದರ್ಶಿ ಸಂತೋಷ್ ಬಜಾಲ್ ಉದ್ಘಾಟಿಸಿ ಮಾತನಾಡಿ, ಕುತ್ತಾರು ಪ್ರದೇಶದ ವರ್ಷಿತ್ ಕುಲಾಲ್ ರವರು ಡಿವೈಎಫ್ಐನ ಸಕ್ರೀಯ ಸದಸ್ಯರಾಗಿದ್ದು ಯುವಜನ ಚಳುವಳಿಯ ಸಾಮಾಜಿಕ ಕಳಕಳಿ, ತ್ಯಾಗದ ಮನೋಭಾವ ಅವರ ಜೀವನದಲ್ಲಿಯೇ ಹಾಸು ಹೊಕ್ಕಾಗಿತ್ತು. ಅವರ ಬದುಕಿನ ಕೊನೆಯ ಘಳಿಗೆಯ ಬದುಕು ಕೂಡ ಅಂಗಾಗ ದಾನದ ಮೂಲಕ ಸಾರ್ಥಕತೆಯನ್ನು ಪಡೆಯಿತು. ವರ್ಷಿತ್ ಕುಲಾಲರ ಕುಟಂಬವು ಆವರ ಸಾವಿನ ನೋವಿನ ನಡುವೆಯೂ ಅಂಗಾಂಗ ದಾನಕ್ಕೆ ಮುಂದಾಗಿ ಅಮೂಲ್ಯ ನಾಲ್ಕು ಜೀವಗಳನ್ನು ಉಳಿಸಿದೆ. ವರ್ಷಿತರ ಕುಟುಂಬದ ಈ ನಿರ್ಧಾರವು ಪ್ರಶಂಸನೀಯ ಎಂದರು. ಮುಂದುವರೆದು ಮಾತನಾಡುತ್ತಾ ದೃಷ್ಟಿ ದಾನ, ರಕ್ತ ದಾನ, ಅಂಗಾಗ ದಾನ,ದೇಹದಾನಗಳು ಮಹತ್ವದ ದಾನಗಳಾಗಿದ್ದು ಸಾಮಾಜಿಕವಾಗಿ ಜನರ ನಡುವೆ ಈ ಕುರಿತಾದ ಜ್ಞಾನದ ಕೊರತೆ ಇದೆ. ಇದರ ಅವಶ್ಯಕತೆ ಸಮಾಜಕ್ಕಿದ್ದು ಈ ಕುರಿತು ಅರಿವು ಮೂಡಿಸುವ ಕೆಲಸ ನಮ್ಮಿಂದ ಆಗಬೇಕಿದೆ ಎಂದರು.

 ಡಿ ವೈ ಎಫ್ ಐ ನ ದಕ್ಷಿಣ ಕನ್ನಡ ಜಿಲ್ಲಾ ಅಧ್ಯಕ್ಷ ಅಡ್ವಕೇಟ್ ಮನೋಜ್ ವಾಮಂಜೂರ್ ಮಾತನಾಡಿ, ಜನರಿಗೆ ನಿತ್ಯ ಜಾಗೃತಿಯನ್ನು ಮೂಡಿಸುವುದು ಡಿವೈಎಪ್ಐ ನ ಕರ್ತವ್ಯವಾಗಿರುತ್ತದೆ. ಪ್ರತಿ ಡಿ ವೈ ಎಫ್ ಐ ಸದಸ್ಯರು ಸಂಚಾರಿ ನಿಯಮಗಳ ಪಾಲನೆಯು ಕಾನೂನಿನ ನಿಯಮಕ್ಕಿಂತಲೂ ಅದು ನಮ್ಮ ಮತ್ತು ನಮ್ಮ ಕುಟುಂಬದ ಒಳಿತಿಗಾಗಿ ಪಾಲಿಸಬೇಕು ಮತ್ತು ಇತರರಿಗೂ ಸಂಚಾರಿ ನಿಯಮಗಳ ಕುರಿತು ಅರಿವು ಮೂಡಿಸಲು ಕಾನೂನು ಸುವ್ಯವಸ್ಥೆಯ ಜೊತೆ ಕೈಜೋಡಿಸಬೇಕು ಎಂದರು.

ಈ ಸಭೆಯನ್ನು ಉದ್ದೇಶಿಸಿ ಡಿವೈ ಎಫ್ಐನ ಉಳ್ಳಾಲ ತಾಲೂಕು ಅಧ್ಯಕ್ಷರಾದ ಅಡ್ವಕೇಟ್ ನಿತಿನ್ ಕುತ್ತಾರ್ ರವರು ಮಾತನಾಡಿ, ಸಂಚಾರಿ ನಿಯಮಗಳಲ್ಲಿ ಜೀವ ವಿಮೆ ಇದ್ದು ಬಹುತೇಕ ಯುವಕರು ಕಡಿಮೆಯ ವಿಮೆಯನ್ನು ಪಡೆದುಕೊಳ್ಳುತ್ತಾರೆ. ನಾವು ವಾಹನ ವಿಮೆಯನ್ನು ಪಡೆದುಕೊಳ್ಳುವ ಸಂದರ್ಭದಲ್ಲಿ ಥಾರ್ಡ್ ಪಾರ್ಟಿ ವಿಮೆಯನ್ನು ಕಡ್ಡಾಯವಾಗಿ ಪಡೆದುಕೊಳ್ಳಬೇಕು. ವಿಮೆ ಇದ್ದು ಇತರೇ ನಿಯಮಗಳನ್ನು ಪಾಲಿಸದೇ ಇದ್ದರೆ ಜೀವ ವಿಮೆಯು ಕೂಡ ಆನ್ವಯವಾಗುವುದಿಲ್ಲ. ಹಾಗಾಗಿ ಹೊಗೆ ತಪಾಸಣೆ, ಚಾಲನಾ ಪರವಾನಿಗೆ, ಹೆಲ್ಮೆಟ್ ಮೊದಲಾದ ನಿಯಮಗಳನ್ನು ಪಾಲಿಸಬೇಕು. ಹದಿನೆಂಟನೇ ವಯಸ್ಸಿನ ಒಳಗಿನ ಮಕ್ಕಳ ವಾಹನ ಚಲಾವಣೆ ಅಥವಾ ಪ್ರಾಯ ಸಮರ್ಥರು ವಾಹನ ಪರವಾನಿಗೆ ಇಲ್ಲದೆ ವಾಹನ ಚಲಾಯಿಸಿದರೆ ಅಂತಹ ಪ್ರಖರಣವನ್ನು ಕಾನೂನು ಗಂಭೀರವಾಗಿ ಪರಿಗಣೆಸುತ್ತದೆ.ಹಾಗಾಗಿ ನಾವು ಇರುವ ಸಂಚಾರಿ ಕಾನೂನು ಪಾಲಿಸಬೇಕು. ಕಾನೂನುಗಳನ್ನು ಜವಾಬ್ದಾರಿಯುತವಾಗಿ ಪಾಲಿಸುವ ಮೂಲಕ ನಮ್ಮ ಸಂಚಾರಿ ಹಕ್ಕುಗಳನ್ನು ಕೂಡ ನಾವು ಪಡೆದುಕ್ಕೊಳ್ಳಲು ಸಾಧ್ಯವಾಗಬೇಕು ಎಂದರು.

DYFI ಜಿಲ್ಲಾ ಉಪಾಧ್ಯಕ್ಷರಾದ ಸುನಿಲ್ ತೇವುಲ, ಉಳ್ಳಾಲ ವಲಯ ಸಮಿತಿ ಸದಸ್ಯರಾದ ನಿತೇಶ್ ತಲೆನೀರು , DYFI ಮಾಜಿ ಜಿಲ್ಲಾ ಮುಖಂಡರು , ಮುನ್ನೂರು ಗ್ರಾಮ ಪಂಚಾಯತ್ ಉಪಾಧ್ಯಕ್ಷರಾದ ಮಹಾಬಲ್ ಟಿ , ರೈತ ಮುಖಂಡರ ಶೇಖರ್ ಕುಂದರ್,ಕಾರ್ಮಿಕ ಮುಖಂಡರಾದ ಜಯರಾಮ್ ತೇವುಲ, ಮೊದಲಾದವರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು. ಘಟಕದ ಕಾರ್ಯದರ್ಶಿ ಸ್ವಾಗತಿಸಿ, ಅಭಿಷೇಕ್ ಕುತ್ತಾರು ವಂದಿಸಿದರು.